خیبر پختونخوا میں پاک-افغان سرحد پر دراندازی کی دو کوششیں ناکام،13 خوارج ہلاک۔
ضلع مہمند میں دراندازی کی کوشش ناکام بناتے ہوئے 8 جبکہ ضلع شمالی وزیر ستان میں 5 خوارج کو جہنم واصل کیا گیا، آئی ایس پی آر
راولپنڈی:خیبر پختونخوا میں پاک-افغان سرحد پر دراندازی کی دو کوششیں ناکام بنا دی گئیں، جن میں بھارت کی سرپرستی میں کام کرنے والے فتنہ الخوارج کے 13 دہشت گرد ہلاک کر دیے گئے۔
آئی ایس پی آر کے مطابق ضلع مہمند میں سیکیورٹی فورسز نے سرحد کے ذریعے دراندازی کی کوشش کرنے والے خوارج کے ایک گروہ کی نقل و حرکت کا بروقت سراغ لگایا۔ فورسز نے مؤثر کارروائی کرتے ہوئے آٹھ دہشت گردوں کو ہلاک کر دیا۔
دوسری کارروائی شمالی وزیرستان میں کی گئی جہاں سیکیورٹی فورسز نے دراندازی کی ایک اور کوشش ناکام بناتے ہوئے شدید فائرنگ کے تبادلے کے بعد پانچ خوارج کو ہلاک کر دیا۔
آئی ایس پی آر کا کہنا ہے کہ 28 اور 29 اپریل کے دوران یہ کارروائیاں اس امر کی واضح عکاسی کرتی ہیں کہ افغان طالبان حکومت اپنی سرحدی ذمہ داریوں کو مؤثر انداز میں ادا کرنے میں ناکام رہی ہے۔ افغان حکام کو چاہیے کہ وہ اپنی سرزمین پاکستان کے خلاف دہشت گردی کے لیے استعمال ہونے سے روکیں اور اس میں ملوث عناصر کے خلاف کارروائی کریں۔
ترجمان پاک فوج نے مزید کہا کہ پاکستان کی سیکیورٹی فورسز ملکی سرحدوں کے دفاع کے لیے پُرعزم ہیں اور علاقے میں مزید دہشت گردوں کے خاتمے کے لیے کلیئرنس آپریشنز جاری ہیں۔
آئی ایس پی آر کے مطابق “عزمِ استحکام” کے تحت سیکیورٹی فورسز اور قانون نافذ کرنے والے ادارے ملک سے بیرونی سرپرستی میں ہونے والی دہشت گردی کے مکمل خاتمے تک اپنی کارروائیاں بھرپور انداز میں جاری رکھیں گے۔
