شیر تو بلی نکلا،ن لیگ اقتدار میں آکر اپنا ذاتی حساب لینا چاہتی ہے،بلاول بھٹو
اسلام آباد ( یواین آءی )پیپلز پارٹی کے چیئرمین بلاول بھٹو زرداری نے کہا ہے کہ اسلام آباد کے حکمرانوں کو احساس نہیں کہ عوام کتنی تکلیف میں ہیں، نظر نہیں آرہا ہے کہ چیئرمین پی ٹی آئی کو موقع ملے گا۔
دیر بالا میں ورکرز کنونشن سے خطاب کرتے ہوئے بلاول بھٹو زرداری نے کہا کہ ہمیں نفرت کی سیاست کو چھوڑنا پڑے گا۔نظر نہیں آرہا ہے کہ چیئرمین پی ٹی آئی کو موقع ملے گا، ن لیگ اور پی ٹی آئی سے کوئی مسئلہ نہیں، پیپلز پارٹی کا کوئی سیاسی مخالف نہیں ہے۔
انہوں نے کہا کہ شہید بھٹو کا نواسہ اور شہید بے نظیر کا بیٹا ہوں، ہماری مخالف مہنگائی، غربت اور بے روزگاری ہے، دوسری جماعتوں کا ارادہ نہیں کہ وہ عوام کی خدمت کریں۔
بلاول بھٹو نے کہا کہ ن لیگ اور پی ٹی آئی کا مقصد ایک ہی ہے، ن لیگ اقتدار میں آکر اپنا ذاتی حساب لینا چاہتی ہے، پتا نہیں ن لیگ کس کس سے حساب لے گی، دوسری جماعتوں کا ارادہ نہیں کہ وہ عوام کی خدمت کریں۔
بلاول بھٹو نے کہا کہ آپ نے مہنگائی لیگ کا چہرہ دیکھ لیا، شیر تو بلی نکلا، کوئی مسئلہ ایسا نہیں جس کا حل نہیں نکالا جاسکتا۔
چیئرمین پیپلز پارٹی نے کہا کہ کچھ لوگ کہتے ہیں کہ فروری میں برف باری ہوگی الیکشن آگے کردیں، الیکشن گرمی میں ہوں یا سردی میں، جیالے ہر وقت تیار ہوتے ہیں۔
