واشنگٹن(یو این آئی) سابق امریکی صدر ڈونلڈ ٹرمپ نے کہا کہ اگر میں صدر ہوتا تو اسرائیل پر ایران کبھی حملہ نہ کرپاتا۔
امریکی نشریاتی ادارے کے مطابق ڈونلڈ ٹرمپ نے امریکی صدر جوبائیڈن کو کڑی تنقید کا نشانہ بناتے ہوئے کہا کہ موجودہ حکومت کی بزدلی کی وجہ سے ایران نے اسرائیل پر حملہ کیا۔
سابق امریکی صدر نے مزید کہا کہ ایران کے اسرائیل پر حملے کے معاملے میں موجودہ حکومت نے جو کمزوری دکھائی وہ ناقابلِ یقین ہے۔ جوبائیڈن نے اسرائیل کی ویسی حمایت نہیں کی جیسے کرنی چاہیے تھی۔
یہ خبر پڑھیں : اسرائیل پر مزید حملوں سے متعلق ایران کے آرمی چیف کا بیان سامنے آگیا
ڈونلڈ ٹرمپ نے مزید کہا کہ جوبائیڈن انتظامیہ کی کمزوری کا فائدہ اُٹھاتے ہوئے حماس اور ایران نے اسرائیل پر حملہ کیا جس کی وجہ سے مشرق وسطیٰ میں امریکی مفادات کو شدید نقصان پہنچا ہے۔
سابق امریکی صدر نے اسرائیلی وزیراعظم نیتن یاہو کو اپنی ہر ممکن مدد کا یقین دلاتے ہوئے کہا کہ اگر میں دوبارہ صدر بن گیا تو اسرائیل کو کسی بھی معاملے میں تنہا نہیں چھوڑیں گے۔یاد رہے کہ سابق امریکی صدر ڈونلڈ ٹرمپ متعدد بار حماس کو جڑ سے ختم کرنے کی دھمکی دے چکے ہیں۔
