پاکستان میں ڈیجیٹل تجارت کا تصدیقی نظام متعارف،
پاکستان کسٹمز اور پاکستان سنگل ونڈو نے ہانگ کانگ کے ساتھ ڈیجیٹل تجارت کا تصدیقی نظام متعارف کرایا،یہ نظام 25 ستمبر 2026 سے فعال ہوگیا۔
اسلام آباد: پاکستان نے ہانگ کانگ کسٹمز کے ساتھ پاکستان سنگل ونڈو (پی ایس ڈبلیو) کے انضمام کے ذریعے ڈیجیٹل تجارت میں تعاون کو مزید آگے بڑھایا ہے۔اس انضمام کے تحت ہانگ کانگ، چین کے کسٹمز اینڈ ایکسائز ڈیپارٹمنٹ کے تیار کردہ اور زیرِ انتظام بلاک چین پر مبنی ڈیجیٹل دستاویزات کی تصدیق کے پلیٹ فارم ValidAP کو پاکستان سنگل ونڈو سے منسلک کیا گیا ہے۔
یہ انضمام 25 ستمبر 2026 سے فعال ہوگیا ہے۔ اس کے ذریعے پاکستان سنگل ونڈو سے جاری ہونے والی الیکٹرانک تجارتی دستاویزات کی اصلیت اور درستگی کی آزادانہ طور پر تصدیق کی جا سکتی ہے۔ اس مقصد کے لیے کرپٹوگرافک ٹیکنالوجی استعمال کی جاتی ہے، جبکہ اصل دستاویز یا اس میں موجود حساس معلومات کو تصدیقی پلیٹ فارم پر منتقل یا محفوظ کرنے کی ضرورت نہیں ہوتی۔
یہ اقدام پاکستان کسٹمز اور ہانگ کانگ کے کسٹمز اینڈ ایکسائز ڈیپارٹمنٹ کے درمیان 18 مئی 2026 کو ہونے والے مفاہمت کی یادداشت کے بعد سامنے آیا ہے، جس کے تحت پاکستان کسٹمز کی ValidAP میں شمولیت کو باضابطہ شکل دی گئی تھی۔ پاکستان اس پلیٹ فارم میں شامل ہونے والا پہلا ملک ہے اور یہ انضمام ValidAP کے ذریعے ڈیجیٹل دستاویزات کی تصدیق کا پاکستان میں پہلا عملی نفاذ ہے۔
ValidAP میں پاکستان کی شمولیت سے ملک کا ڈیجیٹل تجارتی نظام قابلِ اعتماد الیکٹرانک دستاویزات کی تصدیق کے لیے خطے میں ابھرنے والے نئے طریقہ کار سے منسلک ہوگیا ہے۔ پاکستان کے لیے یہ انضمام ایسے ڈیجیٹل تجارتی نظام کی جانب مزید پیش رفت ہے جہاں دستاویزات الیکٹرانک طور پر جاری، ڈیجیٹل طریقے سے تصدیق اور بین الاقوامی سطح پر قابلِ اعتماد بنائی جا
سکیں گی۔اس سے کاغذی دستاویزات کی تصدیق پر انحصار کم کرنے اور بین الاقوامی تجارت سے متعلق دستاویزات کی کارروائی کو زیادہ تیز اور محفوظ بنانے میں مدد مل سکتی ہے۔
