روسی حملوں میں یوکرین کے 8 افراد ہلاک، درجنوں زخمی

ماسکو:یوکرین کے مختلف علاقوں پر روس کے بڑے پیمانے پر ڈرون اور میزائل حملوں کے نتیجے میں کم از کم 8 افراد ہلاک جبکہ درجنوں زخمی ہوگئے۔

یوکرینی حکام کے مطابق روسی حملوں میں خیرکیف میں ایک رہائشی کمپلیکس بھی نشانہ بنا، جہاں عمارت کو شدید نقصان پہنچا۔ حملے کے فوراً بعد امدادی ٹیموں نے جائے وقوعہ پر پہنچ کر ملبے سے شہریوں کو نکالا اور زخمیوں کو اسپتال منتقل کیا۔

خیرکیف کی رہائشی یولیا بالژی نے حملے کے خوفناک لمحات بیان کرتے ہوئے کہا کہ ہر طرف شیشے بکھر گئے اور دھوئیں کا ایک بڑا بادل فضا میں بلند ہوگیا۔ ان کے مطابق بچے دوسرے کمرے میں سو رہے تھے، جبکہ وہ اور ان کے شوہر شیشے اور دروازے بکھرے ہونے کے باوجود بچوں کو اٹھا کر اپارٹمنٹ سے نکلنے میں کامیاب ہوئے۔

یوکرینی صدر  ولادی میر زولنسکی نے روس پر حملوں میں شدت لانے کا الزام عائد کرتے ہوئے کہا کہ گزشتہ ایک ہفتے کے دوران روس نے یوکرین پر 2 ہزار 200 سے زائد ڈرونز، ایک ہزار 630 فضائی بم اور 38 میزائل داغے۔

دوسری جانب روسی وزارت دفاع نے مؤقف اختیار کیا کہ حملوں میں یوکرین کی ان دو کمپنیوں کی تنصیبات کو نشانہ بنایا گیا جو یوکرینی فوج کو خدمات فراہم کر رہی تھیں۔

کریملن کے ترجمان Dmitry Peskov نے کہا کہ روسی حملے حالیہ عرصے میں روسی اہداف پر یوکرینی حملوں کے جواب میں کیے جا رہے ہیں۔ ان کے مطابق یوکرین کو حالیہ اقدامات کی قیمت چکانا ہوگی اور روسی افواج یوکرین میں ان اہداف کو نشانہ بناتی رہیں گی جنہیں وہ مناسب سمجھتی ہیں۔

روس اور یوکرین کے درمیان ایک دوسرے پر حملوں کے الزامات کا سلسلہ جاری ہے، جبکہ دونوں ممالک کے درمیان امن مذاکرات کی بحالی کی کوششیں بھی جاری ہیں۔