بیرسٹر افتخار گیلانی آزاد کشمیر کے نئے وزیر اعظم منتخب ، عہدے کا حلف اٹھا لیا
افتخار گیلانی کو وزیر اعظم کے انتخاب کے لیے 30 ووٹ ملے ، ان کے مدمقابل پیپلزپارٹی کے سردار مختار احمد 14 ووٹ حاصل کر پائے ۔
مظفر آباد: آزاد جموں و کشمیر کے نو منتخب وزیراعظم افتخار گیلانی نے اپنے عہدے کا حلف اٹھا لیا۔ قائم مقام صدر آزاد کشمیر چودھری طارق فاروق نے ان سے حلف لیا۔
قبل ازیں افتخار گیلانی کو وزیر اعظم کے انتخاب کے لیے قانون ساز اسمبلی کے 30 ارکان نے ووٹ دیے جبکہ ان کے مدمقابل پیپلزپارٹی کے سردار مختار احمد کو 14 ووٹ ملے،
حلف برداری کے بعد آزاد کشمیر قانون ساز اسمبلی سے خطاب کرتے ہوئے وزیراعظم افتخار گیلانی کا کہنا تھا کہ وہ وزیراعظم پاکستان شہباز شریف، قائد مسلم لیگ ن نواز شریف اور وزیراعلیٰ پنجاب مریم نواز کے شکر گزار ہیں۔
انہوں نے کہا کہ وزیراعظم کے منصب پر اعتماد کا اظہار کرنے پر پارٹی قائدین سمیت تمام افراد کا شکر گزار ہوں، آزاد کشمیر کو ترقی اور خوشحالی کی مثال بنانے کے لیے سب کو مل کر چلنا ہوگا۔
نومنتخب وزیر اعظم کا مزید کہنا تھا کہ حکومت کو اپنے مقاصد کے حصول کے لیے قانون ساز اسمبلی کے ارکان کی حمایت درکار ہے، تمام ممبران کے تعاون سے آزاد کشمیر کی بہتری کے لیے کام کریں گے۔
