امریکہ،ایران جنگ بندی کے لیے پاکستان کا مستحکم کردار، عالمی برادری کی ستائش۔
وزیر اعظم شہباز شریف کی تجویز پر امریکہ جنگ بندی اور ایران آبنائے ہرمز کھولنے پر آمادہ، دنیا بھر کے ممالک کی وزیر اعظم کی کوششوں کی تعریف اور جنگ بندی کی تائید،
اسلام آباد: پاکستان کا خطے میں امن اور امریکہ ، ایران کے درمیان ثالثی کی کوششوں کے لیے کردار، وزیر اعظم شہباز شریف کے گذشتہ شب کی ٹویٹ کے بعد کشیدگی تھم گئی اور جنگ جاری رہنے کا خطرہ وقتی طور پر ٹل گیا،
امریکی صدر ڈونلڈ ٹرمپ نے پاکستان کی درخواست پر عمل کرتے ہوئے ایران پر بڑے حملے کی ڈیڈ لائن میں 2 ہفتے کی توسیع کر دی، ایران بھی پاکستان کی تجویز مانتے ہوئے عارضی جنگ بندی پر رضا مند ہوگیا۔
اپنے بیان میں انہوں نے کہا کہ یہ فیصلہ پاکستان کے وزیراعظم شہباز شریف اور فیلڈ مارشل عاصم منیر کے ساتھ ہونے والی بات چیت کے بعد کیا گیا جنہوں نے ایران کے خلاف فوری کارروائی مؤخر کرنے کی درخواست کی تھی۔
صدر ٹرمپ نے مزید کہا کہ یہ جنگ بندی اس شرط کے ساتھ مشروط ہے کہ ایران آبنائے ہرمز کو مکمل، فوری اور محفوظ انداز میں کھولنے پر آمادہ ہو جائے، اس اقدام کا مقصد خطے میں کشیدگی کم کرنا اور دیرپا امن کیلئے راہ ہموار کرنا ہے۔
وزیر اعظم شہباز شریف نے ایکس پر اپنے پیغام میں لکھا کہ انتہائی عاجزی کے ساتھ مجھے یہ اعلان کرتے ہوئے خوشی محسوس ہو رہی ہے کہ ایران اور امریکا، اپنے اتحادیوں کے ساتھ ہر جگہ بشمول لبنان فوری طور پر جنگ بندی پر متفق ہو گئے ہیں۔
انھوں نے کہا کہ میں اس دانشمندانہ فیصلے کا گرمجوشی سے خیرمقدم کرتا ہوں اور دونوں ممالک کی قیادت کا شکریہ ادا کرتا ہوں۔ ساتھ ہی میں ان کی مذاکراتی ٹیموں کو دعوت دیتا ہوں کہ وہ جمعہ، 10 اپریل کو اسلام آباد تشریف لائیں، تاکہ تمام تنازعات کے حتمی حل کے لیے مزید بات چیت کی جا سکے۔‘
وزیر اعظم شہباز شریف نے کہا کہ وہ آنے والے دنوں میں مزید خوشخبریاں شیئر کرنے کے منتظر ہیں۔
