اسلام آباد(یو این آئی) الیکشن کمیشن آف پاکستان نے پی ٹی آئی کے انٹرا پارٹی انتخابات کو غیر آئینی قرار دیتے ہوئے ’بلے‘ کا انتخابی نشان واپس لے لیا۔
محفوظ فیصلہ سنادیا گیا، جس میں کہا گیا ہے کہ پی ٹی ائی نے اپنے انتخابات پارٹی ائین کے مطابق نہیں کروائے، پی ٹی ائی سے بلے کا نشان واپس لے لیا گیا۔
جاری فیصلے میں بتایا گیا ہے کہ چیف الیکشن کمشنر کی سربراہی میں پانچ رکنی بینچ نے پی ٹی آئی انٹراپارٹی الیکشن کو کالعدم قرار دیا۔
پی ٹی آئی انٹرا پارٹی انتخابات کروانے میں ناکام رہی، جس کی بنیاد پر تحریک انصاف سے انتخابی نشان واپس لے رہے ہیں اور اُس کو اب بلے کا نشان نہیں ملے گا۔
تحریک انصاف موقع ملنے کے باوجود شفاف انٹراپارٹی الیکشنز کرانے میں ناکام رہی، الیکشنز ایکٹ کی سیکشن 215 کے تحت کاروائی کرتے ہوئے پی ٹی آئی سے انتخابی نشان واپس لیا جاتا ہے۔
گیارہ صفحات پر مشتمل فیصلہ ممبر الیکشن کمیشن خیبرپختونخوا نے جاری کیا، جس میں مزید کہا گیا ہے کہ چار دسمبر کا پیش کردہ سرٹیفکیٹ اور مبینہ چیئرمین پی ٹی آئی کا دائر کردہ فارم 65 مسترد کیا جاتا ہے۔
تحریک انصاف نے الیکشن کمیشن کی 23 نومبر کی ہدایات کی روشنی پر عمل کرتے ہوئے انٹرا پارٹی الیکشن نہیں کرائے، جس کی بنیاد پر پی ٹی آئی بلے کے انتخابی نشان کیلیے اب اہل نہیں رہی۔
سیاسی جماعتوں کے انٹرا پارٹی الیکشن کو ریگولیٹ کرنا الیکشن کمیشن کی آئینی و قانونی ذمہ داری ہے۔
