نارووال ۔وفاقی وزیر برائے منصوبہ بندی و ترقی احسن اقبال نے سابق وزیراعظم عمران خان پر سخت تنقید کرتے ہوئے الزام عائد کیا کہ انہوں نے ان پر جھوٹے الزامات لگائے، اور آج خود اڈیالہ جیل میں ایک عبرت کی مثال بنے ہوئے ہیں۔
نارووال میں ایک تقریب سے خطاب کرتے ہوئے احسن اقبال نے کہا کہ عمران خان نے سوشل میڈیا پر انہیں چور کہا تھا۔ انہوں نے بتایا کہ اس الزام کے بعد انہوں نے دعا کی تھی کہ اگر وہ واقعی چوری کے مرتکب ہوئے ہیں تو اللہ انہیں سزا دے، لیکن اگر یہ الزام جھوٹا ہے تو الزام لگانے والا عبرت کی مثال بنے۔ احسن اقبال کا کہنا تھا کہ آج عمران خان اڈیالہ جیل میں قید ہیں، اور یہ ان کے لیے ایک سبق ہے۔
انہوں نے عمران خان کے دورِ حکومت کو تنقید کا نشانہ بناتے ہوئے کہا کہ ان کے ترقی کے دعوے محض باتوں تک محدود رہے۔ احسن اقبال نے کہا کہ وہ پی ٹی آئی کے حامیوں سے پوچھتے ہیں کہ کیا عمران خان واقعی ان کے لیے مثالی رہنما تھے؟ انہوں نے مزید کہا کہ عمران خان کے 4 سالہ دورِ حکومت میں کسی بڑے تعلیمی ادارے، اسپتال یا موٹر وے کا قیام عمل میں نہیں آیا، بلکہ صرف ’مفت باورچی خانے‘ کھولنے کے دعوے کیے گئے، جن کی فنڈنگ حکومت نے نہیں بلکہ سیلانی فاؤنڈیشن جیسے نجی اداروں نے کی تھی۔
احسن اقبال نے نارووال میں اپنی خدمات کا حوالہ دیتے ہوئے کہا کہ آج نارووال ایک تعلیمی مرکز بن چکا ہے، جہاں دوسرے شہروں سے طلبہ تعلیم حاصل کرنے آتے ہیں۔ انہوں نے یہ بھی بتایا کہ ضلع میں ایک اعلیٰ درجے کا اسپتال اور میڈیکل کالج قائم کیا گیا ہے، اور آئندہ سال ایک زرعی کالج بھی کھولا جائے گا۔
