جعلی ویزوں کے دھندے میں ملوث ایجنٹ مافیا کے خلاف موثر کریک ڈاؤن کا آغاز،
وفاقی وزیر داخلہ محسن نقوی اور وفاقی وزیر سمندر پار پاکستانیز چوہدری سالک حسین کی زیر صدارت خصوصی اجلاس، متعدد اہم فیصلے کر لیے گئے،
اسلام آباد: جعلی دستاویزات پر بیرون ممالک جانے والے مسافروں کے خلاف شکنجہ سخت کرنے اور پروٹیکٹر اور امیگریشن سسٹم میں بہتری لانے کا فیصلہ جبکہ جعلی ویزوں کے دھندے میں ملوث عناصر اور ایجنٹ مافیا کے خلاف موثر کریک ڈاؤن کا حکم دیا گیا،
وفاقی وزیر داخلہ محسن نقوی اور وفاقی وزیر سمندر پار پاکستانیز چوہدری سالک حسین کی زیر صدارت خصوصی اجلاس منعقد ہوا جس میں گرین پاسپورٹ کی درجہ بندی بہتری لانے کے لیے متعدد اہم فیصلے کئے گئے،
اجلاس میں پروٹیکٹر کے اجراء کے نظام کو فول پروف بنانے کا فیصلہ کیا گیا اور یہ بھی طے کیا گیا کہ مسافروں کی سہولت کیلئے امیگریشن سسٹم میں بھی اصلاحات لائی جائیں گی،
وفاقی وزراء نے اس سلسلے میں 7 روز میں حتمی سفارشات طلب کر لیں،
وفاقی وزیر داخلہ نے کہا کہ غیر قانونی امیگریشن روکنے کیلیے جنوری سے اسلام آباد میں اے آئی بیسڈ ایپ کا پائلٹ پراجیکٹ شروع کیا جا رہا ہے۔اس ایپ کے ذریعے پہلے سے ہی علم ہو جائے گا کہ کون سفر کے قابل ہے اور کون نہیں،
انہوں نے کہا کہ ڈیپورٹ شدہ افراد کا پاسپورٹ منسوخ ہونے کے بعد انہیں دوبارہ ویزہ نہ ملنے کو یقینی بنائیں گے،
یکساں انٹرنیشنل ڈرائیونگ لائسنس نیشنل پولیس بیورو سے جاری کیا جائے گا۔ گرین پاسپورٹ کی درجہ بندی بہتر بنانے کیلئے دیگر ممالک کے ساتھ رابطے میں ہیں۔ غلط طریقوں سے لوگ باہر جا کر ملک کی ساکھ متاثر کر رہے ہیں،امیگریشن ریفارمز کا مقصد عوام کو سہولت فراہم کرنا اور عالمی ساکھ بہتر بنانا ہے،
اجلاس میں غیر قانونی تارکین وطن اور نامکمل دستاویزات کے حامل افراد کے خلاف کارروائی کے حوالے سے اقدامات کا جائزہ لیا گیا۔ای ڈرائیونگ لائسنس۔پروٹیکٹر اسٹامپ اور امیگریشن امور پر تفصیلی غور کیا گیا،
