فیلڈ مارشل سید عاصم منیر،اہم دورے پر عرب جمہوریہ مصر پہنچ گئے۔
مصر کے وزیر دفاع اور دفاعی پیداوار جنرل عبدالمجید صقر اور مصری مسلح افواج کے چیف آف سٹاف لیفٹیننٹ جنرل احمد خلیفہ فتحی سے ملاقاتیں
راولپنڈی: فیلڈ مارشل سید عاصم منیر،چیف آف آرمی سٹاف اہم دورے پر عرب جمہوریہ مصر پہنچ گئے،
آئی ایس پی آر کے مطابق فیلڈ مارشل کا یہ سرکاری دورہ ہے جس میں انھوں نے مصر کے وزیر دفاع اور دفاعی پیداوار جنرل عبدالمجید صقر اور مصری مسلح افواج کے چیف آف سٹاف لیفٹیننٹ جنرل احمد خلیفہ فتحی سے ملاقاتیں کیں،
ملاقاتوں میں دوطرفہ تعلقات ، علاقائی اور عالمی صورتحال سمیت دیگر اہم امور پر تبادلہ خیال کیا ۔
آئی ایس پی آر کے مطابق اس دورے کا مقصد دونوں برادر ممالک کے درمیان فوجی تعاون اور دفاعی تعاون کو بڑھانا ہے۔
فیلڈ مارشل نے مصر کے وزیر دفاع اور دفاعی پیداوار جنرل عبدالمجید صقر اور مصری مسلح افواج کے چیف آف سٹاف لیفٹیننٹ جنرل احمد خلیفہ فتحی سے ملاقات میں اس بات کا اعادہ کیا کہ مصر ایک برادر ملک ہے اور دونوں ریاستوں کے درمیان تعاون سے نہ صرف دونوں ریاستوں کے عوام کو فائدہ پہنچے گا بلکہ اس سے خطے میں امن و استحکام کے حصول میں بھی مدد ملے گی۔
وزارت دفاع کے دورے کے دوران فیلڈ مارشل کا پرتپاک استقبال کیا گیا اور انہیں گارڈ آف آنر پیش کیا گیا۔ فیلڈ مارشل نے نامعلوم فوجی کی یادگار اور مرحوم صدر محمد انور السادات کی قبر پر پھولوں کی چادر بھی چڑھائی۔
آرمی چیف نے مشائخط الازہر الشریف میں الازہر کے مرکزی امام شیخ احمد الطیب سے بھی ملاقات کی۔ عظیم الشان امام نے امت مسلمہ کو درپیش چیلنجز پر اپنے خیالات کا اظہار کیا۔آرمی چیف سید عاصم منیر نے انتہا پسندانہ نظریات اور اسلام کی متضاد تشریحات کو ختم کرنے کی ضرورت کو اجاگر کیا۔
