کینیڈا میں حالیہ ہونے والے عام انتخابات میں پاکستانی نژاد امیدواروں نے قابلِ ذکر کامیابیاں حاصل کی ہیں اور سیاسی میدان میں اپنی موجودگی کا لوہا منوایا ہے۔
عالمی خبر رساں اداروں کے مطابق، اگرچہ ابھی تک تمام سرکاری نتائج جاری نہیں ہوئے، لیکن ابتدائی نتائج کے مطابق پاکستانی نژاد امیدواروں نے اپنے ووٹرز کا اعتماد جیتنے میں کامیابی حاصل کی ہے۔
غیر حتمی اور غیر مصدقہ اطلاعات کے مطابق، جن پاکستانی نژاد امیدواروں نے کامیابی حاصل کی ہے، ان میں اقرا خالد اور لبرل پارٹی کی سلمیٰ زاہد شامل ہیں۔ اس کے علاوہ، لبرل پارٹی کے شفقت علی، یاسر نقوی اور سمیر زبیری کے بھی انتخابی میدان میں جیتنے کے امکانات روشن ہیں۔
واضح رہے کہ 2025 کے انتخابات میں 50 سے زائد پاکستانی نژاد امیدوار مختلف سیاسی جماعتوں کے پلیٹ فارم سے میدان میں اُترے تھے، جن میں لبرل پارٹی، نیو ڈیموکریٹک پارٹی، گرین پارٹی اور دیگر جماعتیں شامل تھیں۔
پاکستانی نژاد امیدواروں کی اس کامیابی سے ظاہر ہوتا ہے کہ کینیڈا میں پاکستانی کمیونٹی کی سیاسی شمولیت اور اثر و رسوخ میں بتدریج اضافہ ہو رہا ہے۔
