جسٹن ٹروڈو کے ایک دہائی پر مشتمل اقتدار کا سفر ختم ہونے کے بعد کینیڈا کی حکمراں جماعت لبرل پارٹی کے رہنما مارک کارنی نے وزیراعظم کے عہدے کے لیے حلف اٹھا لیا۔ عالمی خبر رساں ادارے کے مطابق 59 سالہ مارک کارنی ایک سیاست دان اور سابق بینکر ہیں، لیکن یہ پہلی بار ہے کہ انہوں نے کوئی عوامی عہدہ سنبھالا ہے۔
مارک کارنی کینیڈا کے وہ واحد وزیراعظم ہیں جو اب تک کسی پارلیمنٹ کے رکن نہیں رہے تھے۔ انہوں نے یہ عہدہ اُس وقت سنبھالا ہے جب کینیڈا کو شدید چیلنجز کا سامنا ہے، جن میں سب سے بڑا مسئلہ امریکی صدر ڈونلڈ ٹرمپ کا کینیڈا کی خودمختاری پر حملہ ہے۔
وزیراعظم بننے کے بعد مارک کارنی کو اپنی پارٹی کے انتخابات بھی کرانے ہیں جو سال کے آخر میں ہوں گے۔
یاد رہے کہ جسٹن ٹروڈو نے جنوری میں استعفیٰ دینے کا اعلان کیا تھا، جب عوامی سروے میں یہ ظاہر ہو رہا تھا کہ لبرل پارٹی آئندہ انتخابات میں شکست کا سامنا کر سکتی ہے۔ جسٹن ٹروڈو کے مستعفی ہونے کے بعد لبرل پارٹی نے مارک کارنی کو اپنے نئے رہنما کے طور پر منتخب کیا تھا۔ مارک کارنی نے 9 مارچ کو لبرل پارٹی کے رہنما کے طور پر بھاری اکثریت سے انتخاب جیتا جس کے بعد جسٹن ٹروڈو نے اپنا عہدہ چھوڑا۔
