راولپنڈی ۔1971 کی جنگ کے دوران جرأت، بہادری اور قربانی کی بے مثال داستان رقم کرنے والے پاکستان کے پہلے نشانِ حیدر کے حقدار، سوار محمد حسین شہید کا 53واں یومِ شہادت آج پوری عقیدت اور احترام کے ساتھ منایا جا رہا ہے۔
پاک فوج کے شعبہ تعلقات عامہ (آئی ایس پی آر) کے مطابق، چیئرمین جوائنٹ چیفس آف اسٹاف کمیٹی، تینوں مسلح افواج کے سربراہان اور دیگر عسکری قیادت نے سوار محمد حسین شہید کی بے مثال قربانی کو شاندار الفاظ میں خراجِ تحسین پیش کیا۔
آئی ایس پی آر کے مطابق، 1971 کی جنگ کے دوران ظفروال-شکرگڑھ کے محاذ پر سوار محمد حسین شہید نے اپنی غیر معمولی جرأت اور مہارت سے دشمن کے 16 ٹینک تباہ کرنے میں اہم کردار ادا کیا۔
وہ دشمن کے خلاف اگلے محاذ پر خدمات انجام دیتے ہوئے فرض کی تکمیل کے دوران مشین گن کی گولی لگنے سے شہید ہوئے۔
عسکری قیادت کا کہنا ہے کہ سوار محمد حسین شہید کی قربانی ہمارے لیے مشعلِ راہ ہے اور وہ مادرِ وطن کے دفاع کے لیے افواجِ پاکستان کے ناقابل تسخیر عزم کی علامت ہیں۔
آئی ایس پی آر نے مزید کہا کہ قوم ان بہادر سپوتوں کی قربانیوں کو ہمیشہ یاد رکھے گی جنہوں نے ملک کی سلامتی اور حرمت کے لیے اپنی جانیں نچھاور کیں۔
سوار محمد حسین شہید کی بہادری اور وفاداری ہمیشہ پاکستان کی تاریخ میں سنہری حروف سے لکھی جائے گی۔ ان کی قربانی کا جذبہ آج بھی قوم اور افواجِ پاکستان کے لیے باعثِ فخر ہے۔
