لاہور۔پاکستان میں چیمپئنز ٹرافی کے انعقاد کو ناکام بنانے کی کوشش میں بھارتی کرکٹ بورڈ نے ایک نئی حکمت عملی اپنائی ہے، جس کے تحت ایونٹ میں شریک ممالک کو بڑے مالی فوائد کی پیشکش کی گئی ہے۔
ذرائع کے مطابق، بھارتی کرکٹ بورڈ نے چیمپئنز ٹرافی میں شریک ممالک کے کرکٹ بورڈز کو اپنی آمدن میں سے ایک بڑی رقم دینے کی پیشکش کی ہے، تاکہ ایونٹ کو ہائبرڈ ماڈل کے تحت کرانے پر قائل کیا جا سکے، یا پھر میچز بھارت منتقل کروا لئے جائیں۔
مزید یہ کہ بتایا گیا ہے کہ چیمپئنز ٹرافی میں شامل ٹیموں کو یہ ضمانت دی جا رہی ہے کہ انڈین بورڈ ایونٹ سے حاصل ہونے والی آمدن میں دیگر ممالک کے بورڈز کو منافع فراہم کرے گا، اور اس کے علاوہ بھارتی کرکٹ ٹیم کے ساتھ پہلے سے طے شدہ سیریز کے اضافی میچز بھی کرائے جائیں گے۔
پاکستان کرکٹ بورڈ (پی سی بی) پہلے ہی ہائبرڈ ماڈل کو مسترد کر چکا ہے، اور پی سی بی کے ذرائع کا کہنا ہے کہ اگر بھارت پاکستان آ کر کھیلنے سے انکار کرتا ہے تو بہتر یہ ہے کہ کسی اور ٹیم کو ٹورنامنٹ میں شامل کیا جائے اور شیڈول کا اعلان کر دیا جائے، اس لیے ایونٹ کو کسی دوسرے ملک منتقل کرنے کا سوال ہی پیدا نہیں ہوتا۔
