وزیر توانائی اویس لغاری نے کہا ہے کہ وزیراعظم نے گزشتہ روز بجلی سہولت پیکیج کا اعلان کیا ہے، اور ہم چاہتے ہیں کہ ہر سال یہ پیکیج چھ ماہ کے لیے فراہم کیا جائے تاکہ عوام سردیوں میں گیس کے بجائے بجلی استعمال کر سکیں۔
اسلام آباد میں ایک پریس کانفرنس کے دوران انہوں نے کہا کہ حکومت عوام کو بجلی کی قیمتوں میں کمی سے ریلیف دے رہی ہے، اور وزیراعظم نے حال ہی میں بجلی کی قیمتوں میں کمی کا اعلان کیا ہے، جو عوام سے کیے گئے وعدوں کی تکمیل ہے۔ انہوں نے بتایا کہ یہ پیکیج گھریلو، صنعتی اور کمرشل تمام صارفین کے لیے ہے۔
اویس لغاری نے مزید کہا کہ حکومت سستی بجلی کی فراہمی کے لیے کوششیں کر رہی ہے، اور اس سے صنعتوں کی پیداوار میں اضافہ ہوگا۔ انہوں نے واضح کیا کہ حکومت اصلاحاتی ایجنڈے پر کام کر رہی ہے اور بجلی کی قیمتوں میں کمی سے صنعتوں کی پیداواری صلاحیت بڑھے گی۔
وزیر توانائی نے کہا کہ این ٹی ڈی سی ماضی میں بدانتظامی کا شکار رہا ہے، لیکن اب بجلی کے ترسیلی نظام کو بہتر بنانے کے لیے اقدامات کیے جا رہے ہیں۔ جن منصوبوں کو 2016ء میں مکمل ہونا تھا، وہ اب 2026ء تک مکمل ہوں گے۔ انہوں نے کہا کہ اس تاخیر کو ہمارا نظام مزید برداشت نہیں کر سکتا۔ اویس لغاری نے یہ بھی کہا کہ حکومت یہ چاہتی ہے کہ ہر سال چھ ماہ کے لیے ایک ایسا پیکیج لایا جائے جس سے عوام سردیوں میں گیس کے بجائے بجلی کا استعمال کریں۔
