فیلڈ مارشل اور وزیر داخلہ کا دورہ ایران مکمل،وطن واپس پہنچ گئے۔

راولپنڈی: فیلڈ مارشل سید عاصم منیراور وفاقی وزیر داخلہ محسن نقوی نے وفد کے ہمراہ اسلامی جمہوریہ ایران کا تین روزہ سرکاری دورہ مکمل کر لیا۔

دورے کے دوران فیلڈ مارشل نے ایرانی صدر ڈاکٹر مسعود پزشکیان سے ملاقات کی۔ اس کے علاوہ انہوں نے اسپیکر قومی اسمبلی محمد باقر قالیباف، وزیر خارجہ عباس عراقچی اور خاتم الانبیاء ہیڈکوارٹر کے کمانڈر میجر جنرل علی عبداللہی سے بھی الگ الگ ملاقاتیں کیں۔

ملاقاتوں میں خطے میں پائیدار امن کے قیام پر تفصیلی تبادلہ خیال کیا گیا، جس میں علاقائی سیکیورٹی صورتحال، جاری سفارتی کوششوں اور امن و استحکام کے فروغ کے لیے مشترکہ اقدامات پر خصوصی توجہ دی گئی۔ فیلڈ مارشل نے مسائل کے حل کے لیے مکالمے، کشیدگی میں کمی اور مسلسل سفارتی روابط کی اہمیت پر زور دیا۔

فیلڈ مارشل نے ایرانی قیادت اور عوام کی جانب سے پرتپاک مہمان نوازی پر شکریہ ادا کیا۔ انہوں نے صدرِ پاکستان، وزیر اعظم اور عوامِ پاکستان کی جانب سے نیک خواہشات کا پیغام بھی ایرانی قیادت تک پہنچایا اور دونوں ممالک کے درمیان تاریخی و برادرانہ تعلقات کو مزید مضبوط بنانے کے عزم کا اعادہ کیا۔

یہ دورہ مشرقِ وسطیٰ میں جاری تنازعات کے حل کے لیے پاکستان کے مصالحتی کردار اور خطے میں امن، استحکام اور خوشحالی کے فروغ کے عزم کا مظہر ہے۔