موٹر ویز کے ریسٹ ایریاز میں عالمی معیار کی سہو لیات کی فراہمی کا فیصلہ۔

وفاقی وزیر مواصلات عبدالعلیم خان نے موٹرویز کے ریسٹ ایریاز کی صورتحال پر عدم اطمینان کا اظہار کیا اور کہا کہ شہریوں سے ٹول ٹیکس لینا اور اس کے باوجود معیاری سہولیات فراہم نہ کرنا قابلِ قبول نہیں ہو سکتا۔وفاقی وزیرعبدالعلیم خان نے ہدایت کی کہ ملک بھر مین تمام موٹرویز پر بین الاقوامی معیار کے واش رومز، ریسٹ ایریاز اور بنیادی سہولیات کی فراہمی یقینی بنائی جائے۔اور اس سلسلے میں عالمی معیار کے حامل اداروں کی خدمات حاصل کی جائیں۔

عبدالعلیم خان نے مزید کہا کہ شہریوں کو تمام موٹرویز اور ایکسپریس ویز پر وضو اور واش رومز کی بہترین سہولیات میسر ہونی چاہئیں جبکہ صفائی، خوبصورتی، گرین بیلٹس اور سروس ایریاز کو بہتر بنانے کیلئے ہارٹیکلچرسٹ کی شمولیت یقینی بنانے کی بھی ہدایات جاری کی گئیں تاکہ شجر کاری اور لینڈ اسکیپنگ بہتر طریقے سے ہو سکے۔

سیکورٹی کے حوالے سے کہا گیا کہ موٹرویز اور سروس ایریاز کے سکیورٹی سسٹمز کو مکمل طور پر سیف سٹی ادارے کے ساتھ منسلک کیا جائے تاکہ مؤثر نگرانی اور جرائم میں ملوث عناصر کی فوری گرفتاری ممکن ہو سکے۔ انہوں نے این ایچ اے کو اپنا مرکزی مانیٹرنگ ڈیش بورڈ قائم کرنے کی بھی ہدایت کی جس تک چیئرمین این ایچ اے کو آمدن کی وصولی اور کارکردگی کے بارے میں معلومات کے لیے 24/7 رسائی حاصل ہو اور یہ آئی جی موٹرویز کے ساتھ بھی منسلک ہو۔اجلاس میں موٹرویز پر موجود تمام غیر قانونی بل بورڈز اور اشتہارات کو فوری طور پر ختم کرنے کا فیصلہ بھی کیا گیا۔۔