کاروباری ہفتے کے آغاز پر پاکستان سٹاک ایکسچینج میں زبردست تیزی،
100 انڈیکس 1841 پوائنٹس بڑھ کر تاریخ میں پہلی بار ایک لاکھ 36 ہزار 140 پوائنٹس کی سطح پر پہنچ گیا۔
کراچی :کاروباری ہفتے کے آغاز پر پاکستان سٹاک ایکسچینج میں زبردست تیزی دیکھنے میں آئی، 100 انڈیکس 1841 پوائنٹس بڑھ کر تاریخ میں پہلی بار ایک لاکھ 36 ہزار 140 پوائنٹس کی سطح پر پہنچ گیا۔
سوموار کے روز ٹریڈنگ کے دوران سرمایہ کاروں کی جانب سے حصص کی بھرپور خریداری دیکھی جا رہی ہے، خاص طور پر بینکنگ، توانائی اور ٹیکنالوجی کے شعبوں میں مثبت تیزی ہے، معاشی اشاریوں میں بہتری، آئی ایم ایف کی جانب سے مثبت اشارے اور روپے کی قدر میں استحکام نے مارکیٹ کو سہارا دیا ہے۔
تجزیہ کاروں کے مطابق سرمایہ کار حکومتی پالیسیوں، مالیاتی اصلاحات اور غیر ملکی سرمایہ کاری سے متعلق خبریں خوش آئند سمجھ رہے ہیں، جس کا اثر براہِ راست مارکیٹ کی کارکردگی پر پڑ رہا ہے۔
ماہرین کا کہنا ہے کہ اگر یہی رجحان برقرار رہا تو سٹاک مارکیٹ مزید ریکارڈ قائم کر سکتی ہے، تاہم سرمایہ کاروں کو محتاط رہنے اور تکنیکی سطح پر نظر رکھنے کا مشورہ بھی دیا جا رہا ہے۔
یاد رہے کہ پچھلے کاروباری ہفتے کے پانچویں روز کے ایس ای 100 انڈیکس 780 پوائنٹس بڑھ کر پہلی بار ایک لاکھ 34 ہزار 562 پوائنٹس کی ریکارڈ سطح پر بند ہوا تھا۔
