کولمبو۔آر پریماداسا اسٹیڈیم میں ہونے والی ویمنز ون ڈے ٹرائی سیریز کے چوتھے میچ میں سری لنکا نے بھارت کو سنسنی خیز مقابلے کے بعد تین وکٹوں سے زیر کر کے ایک یادگار فتح اپنے نام کی۔ یہ کامیابی سری لنکن خواتین کو بھارت کے خلاف ستمبر 2018 کے بعد پہلی مرتبہ حاصل ہوئی۔
بھارتی خواتین ٹیم نے پہلے کھیلتے ہوئے 50 اوورز میں 9 وکٹوں پر 275 رنز اسکور کیے۔ وکٹ کیپر بلے باز رچا گھوش نے جارحانہ بیٹنگ کرتے ہوئے 48 گیندوں پر 58 رنز بنائے، جس میں پانچ چوکے اور تین چھکے شامل تھے۔ ان کے علاوہ جیمائمہ روڈریگز نے 37، پراتیکا راول نے 35 اور کپتان ہرمن پریت کور نے 30 رنز کی مفید اننگز کھیلی۔
سری لنکا کی بولنگ میں کپتان چماری اتاپتو اور سوگندیکا کماری نے تین، جبکہ انوکا راناویرا اور دیومی وہنگا نے ایک ایک وکٹ حاصل کی۔
ہدف کے تعاقب میں سری لنکن بیٹرز نے عمدہ کارکردگی کا مظاہرہ کیا اور 276 رنز کا ٹارگٹ 49.1 اوورز میں سات وکٹوں کے نقصان پر حاصل کرلیا۔ مڈل آرڈر بلے باز نیلکشی سلوہا نے صرف 33 گیندوں پر 56 رنز کی شاندار اننگز کھیلی، جس میں پانچ چوکے اور تین چھکے شامل تھے، جبکہ اوپنر ہرشیتھا سماراوکرما نے 51 گیندوں پر 53 رنز اسکور کیے۔
کویشا دلہاری نے 35 اور ویشمی گنارتنے نے 33 رنز کے ساتھ ٹیم کو اہم سہارا دیا۔ میچ کے آخری لمحات میں جب سری لنکا کو 44 گیندوں پر 38 رنز درکار تھے اور تین وکٹیں باقی تھیں، تب انوشکا سنجیوانی (23*) اور سوگندیکا کماری (19*) نے بہترین شراکت داری قائم کرتے ہوئے ٹیم کو فتح دلوائی۔
بھارت کی جانب سے سب سے کامیاب بولر اسنیہ رانا رہیں جنہوں نے تین کھلاڑیوں کو آؤٹ کیا، جبکہ ارندھتی ریڈی، پراتیکا راول اور شری چرنی نے ایک ایک وکٹ حاصل کی۔
