نئی دہلی ۔شاہ رخ خان، جو بھارت میں ’بادشاہ‘ اور عالمی سطح پر ’رومانس کا بادشاہ‘ کہلائے جاتے ہیں، اب صرف لوگوں کے دلوں پر ہی نہیں، بلکہ دولت کے میدان میں بھی راج کر رہے ہیں۔
معروف بین الاقوامی جریدے اسکوائر کی تازہ ترین رپورٹ کے مطابق، 2025 کے دنیا کے سب سے دولت مند اداکاروں کی فہرست میں شاہ رخ خان چوتھے نمبر پر آ گئے ہیں۔ ان کی کل دولت کا اندازہ 87 کروڑ 65 لاکھ امریکی ڈالر، یعنی تقریباً 8 ارب 76 کروڑ پاکستانی روپے لگایا گیا ہے۔
قابل ذکر بات یہ ہے کہ اس رینکنگ میں شاہ رخ خان نے نہ صرف کئی مشہور بالی ووڈ فنکاروں کو پیچھے چھوڑا ہے، بلکہ ہالی ووڈ کے کئی بڑے نام بھی ان سے پیچھے رہ گئے ہیں۔ ان میں بریڈ پٹ، جیکی چن، جارج کلونی، ٹام ہینکس اور رابرٹ ڈی نیرو جیسے عالمی شہرت یافتہ اداکار شامل ہیں۔
رپورٹ کے مطابق، اس فہرست میں پہلا مقام آرنلڈ شیوارزنیگر کے پاس ہے جن کی دولت 1.49 ارب ڈالر ہے، دوسرے نمبر پر ڈوین ’دی راک‘ جانسن ہیں جن کی دولت 1.19 ارب ڈالر تک پہنچ چکی ہے، جبکہ ٹام کروز 891 ملین ڈالر کے ساتھ تیسرے نمبر پر ہیں۔ چوتھی پوزیشن شاہ رخ خان کے پاس ہے، اور ان کے بعد پانچویں نمبر پر جارج کلونی 742.8 ملین ڈالر کے ساتھ موجود ہیں۔
رپورٹ میں یہ بھی انکشاف کیا گیا ہے کہ پچھلے پانچ برسوں میں شاہ رخ خان کی دولت میں حیران کن 46 فیصد اضافہ ہوا ہے۔ 2020 میں ان کے اثاثے 60 کروڑ ڈالر تھے، جو 2025 میں بڑھ کر 80 کروڑ 76 لاکھ ڈالر تک پہنچ چکے ہیں۔ اس ترقی کا سہرا صرف ان کی فلمی آمدنی کو نہیں، بلکہ ان کی کاروباری حکمت عملی، سرمایہ کاری کے فیصلوں اور برانڈ کی بڑھتی ہوئی قدر کو بھی جاتا ہے۔
شاہ رخ خان کی حالیہ کامیابیوں میں 2023 میں ریلیز ہونے والی سپر ہٹ فلمیں ’پٹھان‘ اور ’جوان‘ شامل ہیں، جنہوں نے باکس آفس پر نئی تاریخ رقم کی اور انہیں فن کے ساتھ ساتھ دولت کی دنیا میں بھی نئی بلندیوں تک پہنچایا۔
