آئی سی سی چیمپئنز ٹورنامنٹ فول پروف سیکیورٹی کے لیے فوج اور رینجرز کی تعیناتی کا فیصلہ
وفاقی کابینہ سے پاک فوج اور رینجرز کی تعیناتی کی منظوری حاصل کر لی گئی ہے، پاک فوج کی تعیناتی آئین کے آرٹیکل 245 کے تحت کی جائے گی۔
لاہور:آئی سی سی چیمپئنز ٹرافی 2025ء ٹورنامنٹ کے لیے فول پروف سیکیورٹی انتظامات کے سلسلے میں وفاقی حکومت نے پاک فوج اور رینجرز کو تعینات کرنے کا فیصلہ کر لیا ہے۔
ذرائع کے مطابق وفاقی کابینہ سے پاک فوج اور رینجرز کی تعیناتی کی منظوری حاصل کر لی گئی ہے، پاک فوج کی تعیناتی آئین کے آرٹیکل 245 کے تحت کی جائے گی۔
ذرائع کابینہ ڈویژن کے مطابق سیکیورٹی کے لیے رینجرز کی تعیناتی انسدادِ دہشت گردی ایکٹ 1997ء کے تحت ہو گی۔
کراچی کے نیشنل اسٹیڈیم سے ٹورنامنٹ کا آغاز 19 فروری کوہو گا، جہاں پاکستان اور نیوزی لینڈ کے درمیان افتتاحی میچ کھیلا جائے گا۔
ٹورنامنٹ میں پاکستان اور بھارت سمیت آسٹریلیا، انگلینڈ، جنوبی افریقا، بنگلا دیش، افغانستان اور نیوزی لینڈ کی ٹیمیں شرکت کریں گی۔
واضھ رہے کہ بھارت انتہائی ہٹ دھرمی کا مظاہرہ کرتے ہوئے اپنے میچز پاکستان میں کھیلنے پر آمادہ نہ ہوا ، جس کے نتیجے میں بھارتی ٹیم اپنے میچز دوبئی میں کھیلے گی ،
بھارتی ٹیم کے فائنل میں پہنچنے کی صورت میں ٹورنامنٹ کا فائنل بھی دوبئی میں ہو گا جبکہ بھارت کے فائنل کی دوڑ سے باہر ہونے کے نتیجے میں ٹورنامنٹ کا فائنل لاہور میں کھیلا جائے گا۔
