اسلام آباد۔پاکستان مسلم لیگ کے سربراہ چوہدری شجاعت حسین کی ہدایت پر مسلم لیگ نے ملک بھر میں یوم یکجہتی کشمیر قومی جذبے ساتھ منایا،مرکزی تقریب ” آل پارٹیز کشمیر کانفرنس” پارٹی کے ہیومن رائٹس ونگ کے زیراہتمام نیشنل لائبریری اسلام آباد میں منعقد ہوئی،جس میں پاکستان بھر کی سیاسی،مذہبی جماعتوں نے شرکت کی اور کشمیری عوام کے ساتھ اظہار یکجہتی کیا،کانفرنس سے نیشنل پارٹی کے جنرل سیکرٹری سنیٹر میر کبیر، عوامی نیشنل پارٹی کے مرکزی سیکرٹری اطلاعات احسان اللہ خان،پاکستان راہ حق پارٹی کے مولانا معاویہ اعظم، جماعت اسلامی پنجاب کے امیر ڈاکٹر طارق سلیم،متحدہ قومی موومنٹ کے جوائنٹ انچارج زاہد ملک، رکن قومی اسمبلی مسز فرخ خان،مرکزی چیف آرگنائزر ڈاکٹر محمد امجد،پارٹی کے مرکزی سیکرٹری اطلاعات مصطفیٰ ملک، ہیومن رائٹس ونگ کی مرکزی صدر انیلا ایاز چوہدری، ماسکو میں مقیم ممتاز پاکستانی ڈاکٹر جان عالم، فارن افیرز کمیٹی کی وائس چیئرمین مہرین ملک آدم اور دوسرے مقررین نے خطاب کیا، پارٹی کے مرکزی سیکرٹری اطلاعات مصطفیٰ ملک نے پارٹی سربراہ چوہدری شجاعت حسین کی جانب سے شرکاء آل پارٹیز کانفرنس کو خوش آمدید کہااور انکی کشمیر کے حوالے سے خدمات پر روشنی ڈالی، چوہدری شجاعت حسین نے یوم یکجہتی کشمیر کانفرنس پر جاری اپنے پیغام میں کہا کہ پوری قوم اپنے کشمیری بھائیوں کے ساتھ کھڑی ہے، مسلم لیگ پاکستان اور عالمی دنیا میں کشمیریوں کا وکیل ہے۔ پاکستان ہمیشہ کشمیری عوام کی آزادی کے لیے تمام عالمی فورمز پر آواز بلند کرتا رہے گا۔پاکستان مسلم لیگ کے چیف آرگنائزر ڈاکٹر محمد امجد نے دوسری جماعتوں کے رہنماؤں کی کانفرنس میں شرکت پر ان کا شکریہ ادا کیا۔ انہوں نے مسلم لیگ کے ہیومن رائٹس ونگ،دیگر ونگز اور فیڈرل کیپیٹل کی تنظیم کا کانفرنس کے انعقاد پرخصوصی شکریہ ادا کیا۔اپنے خطاب میں انہوں نے کہا کہ بھارت نے مقبوضہ کشمیر کو دنیا کی ایک بہت بڑی جیل بنا دیا ہے۔دنیا بھر میں مسلم ممالک پر مظالم ڈھائے جارہے ہیں مگر عالمی طاقتیں اور اقوام متحدہ اس پر خاموش ہے۔ہم اس ظلم کی مذمت کرتے ہیں۔ کانفرنس سے خطاب کرتے ہوئے مقررین نے اس بات پر زور دیا کہ کشمیر پاکستان کی شہ رگ ہے اور اس مسئلے کو حل کیے بغیر جنوبی ایشیا میں امن قائم نہیں ہو سکتا۔ پاکستان کشمیریوں کی خودمختاری اور حقِ آزادی کے لیے ہر سطح پر تعاون جاری رکھے گا۔
