ملتان۔قومی کرکٹ ٹیم کے اسپنر نعمان علی نے اپنے مختصر ٹیسٹ کیریئر میں دوسری بار 10 وکٹیں لینے کا شاندار کارنامہ انجام دیا ہے۔ ملتان میں جاری سیریز کے دوسرے ٹیسٹ میچ میں 38 سالہ نعمان علی نے اس کامیابی کو اپنے نام کیا۔

نعمان علی نے پہلی اننگز میں ویسٹ انڈیز کے 6 کھلاڑیوں کو آؤٹ کیا اور پھر دوسری اننگز میں 4 کھلاڑیوں کو پویلین کی راہ دکھائی۔

یہ کارنامہ انہوں نے اپنے 18 ٹیسٹ میچز میں سرانجام دیا، جن میں انہوں نے 2.99 کی اکانومی کے ساتھ 83 وکٹیں حاصل کی ہیں۔

اس سے قبل، نعمان علی نے اکتوبر 2024 میں انگلینڈ کے خلاف بھی اسی میدان پر 10 وکٹیں حاصل کی تھیں، اور وہ 10 وکٹیں لینے والے دوسرے پاکستانی لیفٹ آرم اسپنر بنے۔ ان سے پہلے یہ کارنامہ 1980 میں سابق کرکٹر اقبال قاسم نے انجام دیا تھا۔