راولپنڈی ۔سکیورٹی فورسز نے خیبرپختونخوا میں تین علیحدہ علیحدہ کارروائیوں کے دوران 30 خوارج کو ہلاک کر دیا ہے۔پاک فوج کے شعبہ تعلقات عامہ (آئی ایس پی آر) کی جانب سے جاری کردہ اعلامیے کے مطابق، 24 اور 25 جنوری کو خیبرپختونخوا کے مختلف علاقوں میں یہ کارروائیاں انجام دی گئیں۔
پہلی کارروائی ضلع لکی مروت میں کی گئی جہاں خوارج کی موجودگی کی اطلاع ملنے پر انٹیلیجنس کی بنیاد پر آپریشن کیا گیا، جس کے دوران 18 خوارج کو ہلاک کیا گیا اور 6 کو زخمی حالت میں گرفتار کر لیا گیا۔
دوسری کارروائی ضلع کرک میں ہوئی، جہاں سیکیورٹی فورسز کے ساتھ فائرنگ کے تبادلے میں 8 خوارج ہلاک ہوئے۔
تیسری جھڑپ خیبر ضلع کے عمومی علاقے باغ میں ہوئی، جہاں سیکیورٹی فورسز نے 4 خوارج کو ہلاک کر دیا۔ اس کارروائی میں دو طرفہ فائرنگ کے نتیجے میں خارجی رہنما عزیز الرحمن عرف قاری اسماعیل اور خارجی مخلص بھی ہلاک ہوئے، جبکہ دو خوارج زخمی ہوئے۔
آئی ایس پی آر کے مطابق ہلاک ہونے والوں کے قبضے سے اسلحہ اور گولہ بارود بھی برآمد کیا گیا، اور ان دہشت گردوں کے بارے میں بتایا گیا کہ وہ معصوم شہریوں کے قتل میں ملوث تھے۔
اعلامیے میں یہ بھی کہا گیا کہ علاقے میں باقی ماندہ خوارج کو ختم کرنے کے لیے کلیرنس آپریشن جاری ہیں، اور پاک فوج دہشت گردی کے ناسور کو ملک سے مکمل طور پر ختم کرنے کے لیے پرعزم ہے۔