ایف آئی اے کا انسانی سمگلنگ میں ملوث عناصر کے خلاف ملک گیر کریک ڈاون،185 ہیومن سمگلرز اور ایجنٹس گرفتار
انسانی سمگلنگ میں ملوث عناصر کے خلاف پیش رفت رپورٹ جاری،ملوث عناصر کے زیر استعمال 7 کروڑ روپے کے بینک اکاؤنٹس منجمد کیے گئے۔
اسلام آباد:ایف آئی اے کا انسانی سمگلنگ میں ملوث عناصر کے خلاف ملک گیر کریک ڈاون جاری, حالیہ ایک ماہ کے دوران 185 ہیومن سمگلرز اور ایجنٹس کو گرفتار کر لیا گیا جبکہ ادارے میں موجود کالی بھیٹرون کے خلاف بھی شکنجہ تنگ، کارروائیوں کا آغاز،
ایف آئی اے کی جانب سے انسانی سمگلنگ میں ملوث عناصر کے خلاف پیش رفت رپورٹ جاری،
ترجمان ایف آئی اے کے مطابق ریڈ بک میں شامل 38 انتہائی مطلوب انسانی سمگلروں کو گرفتار کیا جا چکا یے جبکہ یونان کشتی حادثہ 2024 میں ملوث 16 ایجنٹس کو بھی گرفتار کر لیا گیا ہے ۔ علاوہ ازیں 20 ایف آئی اے اہلکاروں کو بھی حراست میں لے کر ان کے خلاف تفتیش شروع کر دی گئی ہے۔
رپورٹ میں کہا گیا ہے کہ سال 2023 کے یونان کشتی حادثہ کے حوالے سے 15 اشتہاریوں اور 15 ماسٹر مائنڈ انسانی سمگلروں کو گرفتار کیا گیا۔انسانی سمگلنگ میں ملوث ملزمان کی 45 کروڑ روپے سے زائد مالیت کی جائیداد ضبط کی گئی،
انسانی سمگلنگ میں ملوث عناصر کے زیر استعمال 7 کروڑ روپے کے بینک اکاؤنٹس منجمد کیے گئےاورانٹرپول کے ذریعے انسانی سمگلنگ میں ملوث ملزمان کی گرفتاری کے لئے 20 ریڈ نوٹسز جاری کیے گئے۔
یونان کشتی حادثے میں ملوث 38 ایف آئی اے اہلکاروں کو ملازمت سے برخاست کیا گیا علاوہ ازیں ناقص تفتیش اور پیروی کے باعث 12 ڈپٹی ڈائریکٹرز اور اسسٹنٹ ڈائریکٹرز کو چارج شیٹ کیا گیا، اور وزارتِ داخلہ کو رپورٹس بھجوائی گئیں۔
ناقص نگرانی پر 4 زونل ڈائریکٹرز سے وضاحت طلب کی گئی۔لیبیا کشتی حادثے 2024 کے تناظر میں 30 اہلکاروں کے خلاف محکمانہ کارروائی شروع کی گئی ۔
ڈی جی ایف آئی اے احمد اسحاق جہانگیر کا کہنا ہے کہ کشتی حادثے میں ملوث ایجنٹوں کی گرفتاری کے لئے تمام تر وسائل کو بروئے کار لایا جائے۔
ڈی جی ایف آئی اے نے ایف آئی اے افسران اور عملے کو ہدایت کی ہے کہ ملک کے تمام ائرپورٹس پر ایجنٹوں کے گرفتاری کے لئے کڑی نگرانی کریں اور ائرپورٹ انچارجز اس بات کو یقینی بنائیں کہ کوئی بھی ایجنٹ بیرون ملک فرار نہ ہو پائے۔
