نیوزی لینڈ ویمن کرکٹ ٹیم کو تیسرے ون ڈے میچ میں پاکستان کے ہاتھوں شکست

کرائسٹ چرچ(یو این آئی): پاکستانی ویمن کرکٹ ٹیم نے تیسرے ون ڈے انٹرنیشنل میچ میں نیوزی لینڈ ویمن ٹیم کو سنسنی خیز مقابلے کے بعد سپر اوور میں شکست دے دی۔

نیوزی لینڈ کے شہر کرائسٹ چرچ میں ہونے والے میچ میں نیوزی لینڈ نے پہلے بیٹنگ کرتے ہوئے 8 وکٹوں کے نقصان پر 251 رنز بنائے، پاکستان ویمن ٹیم بھی مقررہ 50 اوور میں 9 وکٹوں کے نقصان پر 251 رنز بنا سکی، میچ کا فیصلہ سپر اوور میں ہوا۔

پاکستانی ٹیم نے سپر اوور میں پہلےبیٹنگ کرتے ہوئے 11 رنز بنائے جبکہ 12 رنز کے ہدف کے تعاقب میں نیوزی لینڈ کی ٹیم صرف 8 رنز پر ہی ڈھیر ہوگئی، پاکستانی ویمن ٹیم نے پہلی مرتبہ ون ڈے انٹرنیشنل میں میزبان ٹیم کو نیوزی لینڈ میں ہرایا ہے۔

یہ محض دوسرا موقع ہے کہ پاکستان ویمن نے نیوزی لینڈ ویمن کو ون ڈے انٹرنیشنل میں شکست دی ہے۔

اس سے قبل اس کی واحد کامیابی نومبر 2017 میں شارجہ میں تھی جہاں اس نے ثناء میر کی 4 وکٹوں اور بسمہ معروف کے ناقابل شکست 36 رنز کی عمدہ کارکردگی کی بدولت 5 وکٹوں سے کامیابی حاصل کی تھی۔

آج کے میچ میں نیوزی لینڈ نے پاکستان ویمن ٹیم کو جیت کے لیے 252 رنز کا ہدف دیا تھا۔

نیوزی لینڈ کی جانب سے میڈی گرین 65 رنز بنا کر ناٹ آؤٹ رہیں جبکہ امیلیا کیر نے 77 اور سوفی ڈیوائن نے 29 رنز بنائے، پاکستان کی طرف سے نشرح سندھو اور غلام فاطمہ نے دو، دو وکٹیں حاصل کیں۔

ہدف کے تعاقب میں پاکستان ویمن کی جانب سے بسمہ معروف نے 68، عالیہ ریاض نے 44 اور فاطمہ ثناء نے 36 رنز سکور کیے جبکہ نجیہہ علوی 23 رنز کے ساتھ ناقابل شکست رہیں۔

واضح رہے کہ نیوزی لینڈ ویمن نے 3 میچز کی سیریز 2 ایک سے اپنے نام کر لی، سیریز کا پہلا میچ نیوزی لینڈ ویمن ٹیم نے 131 رنز اور دوسرا 1 وکٹ سے جیتا تھا۔

Please follow and like us: