ایچ بی ایل پاکستان سپر لیگ 10 میں اسلام آباد یونائیٹڈ نے پشاور زلمی کو 102 رنز سے شکست دے دی۔
راولپنڈی کرکٹ اسٹیڈیم میں کھیلے گئے ایونٹ کے پانچویں میچ میں پشاور زلمی کی ٹیم 19 ویں اوور میں 141 رنز بنا کر آؤٹ ہوگئی۔
زلمی کی جانب سے محمد حارث 87 رنز بنا کر نمایاں رہے۔ حسین طلعت 13، مچل اوون 10، ٹام کوہلر-کیڈمور 8، صائم ایوب 6، محمد علی 3، الزاری جوزف 2، کپتان بابر اعظم 1، سفیان مقیم 1 اور جارج لِنڈے 0 رن بنا کر آؤٹ ہوئے۔
اسلام آباد یونائیٹڈ کی جانب سے عماد وسیم نے 3، شاداب خان اور بین ڈوارسہس نے 2، 2 جبکہ نسیم شاہ، سعد مسعود اور جیسن ہولڈر نے1، 1 وکٹ حاصل کی۔
اس سے قبل ٹاس جیت کر پہلے بیٹنگ کرتے ہوئے اسلام آباد یونائیٹد نے صاحبزادہ فرحان کی دھواں دار سینچری کی بدولت مقررہ 20 اوورز میں 5 وکٹوں کے نقصان پر 243 رنز اسکور کیے۔
یونائیٹڈ کی جانب سے صاحبزادہ فرحان 52 گیندوں میں 106 رنز جارحانہ اننگز کھیل کر نمایاں رہے۔ کولن منرو 40، سلمان آغا 30، اعظم خان 16 رنز بنا کر آؤٹ ہوئے۔
جیسن ہولڈر 20 اور بین ڈوارسہس 18 رنز بنا کر ناٹ آؤٹ پویلین لوٹے۔
پشاور زلمی کی جانب سے الزاری جوزف اور حسین طلعت نے 2، 2 کھلاڑیوں کو آؤٹ کیا۔
