نئی دہلی ۔چیمپیئنز ٹرافی 2025 کی میزبانی کے معاملے پر پاکستان اور بھارت کے درمیان تنازعہ شدت اختیار کر گیا ہے، جس کے دوران بھارتی براڈکاسٹر اسٹار انڈیا کا آئی سی سی کو لکھا گیا ایک خط منظر عام پر آ گیا۔
میڈیا رپورٹس کے مطابق، اسٹار انڈیا نے چند ماہ قبل آئی سی سی کو ایک خط میں انڈین کرکٹ ٹیم کی مقبولیت اور اس کے مالی اثرات پر زور دیا تھا۔
خط میں کہا گیا کہ بھارتی ٹیم آئی سی سی کے سب سے زیادہ ریونیو فراہم کرنے والی ٹیم ہے، اور اس کے ٹورنامنٹ سے باہر ہونے کی صورت میں آئی سی سی کو 750 ملین امریکی ڈالر کے معاہدے میں 90 فیصد نقصان اٹھانا پڑ سکتا ہے۔
اس کے برعکس، پاکستان کی غیر موجودگی سے یہ نقصان صرف 10 فیصد تک محدود رہے گا۔ خط نے اس بات کو واضح کیا کہ آئی سی سی کو اپنے مالی مفادات کو مدنظر رکھتے ہوئے فیصلے کرنے چاہئیں۔
بھارتی کرکٹ بورڈ نے پاکستان کا سفر کرنے سے انکار کرتے ہوئے چیمپیئنز ٹرافی کے لیے ہائبرڈ ماڈل کی تجویز دی تھی، جس پر پاکستان کرکٹ بورڈ (پی سی بی) نے سخت ردعمل ظاہر کیا تھا۔ اس ماڈل کے تحت پاکستان اور بھارت کے میچز متحدہ عرب امارات میں منعقد کیے جائیں گے۔
یہ خط ایسے وقت میں منظر عام پر آیا ہے جب آئی سی سی بورڈ کی میٹنگ 7 دسمبر کو متوقع ہے، جہاں چیمپیئنز ٹرافی کے مستقبل پر فیصلہ کیا جائے گا۔ دونوں ممالک کے کرکٹ بورڈز کے درمیان ہائبرڈ ماڈل پر اتفاق ہو چکا ہے، اور 2027 تک تمام آئی سی سی ایونٹس میں دونوں ممالک کے مینز اور ویمنز میچز دبئی میں کھیلنے کا فیصلہ کیا گیا ہے۔
خط کے لیک ہونے کے بعد آئی سی سی چیئرمین جے شاہ کے کردار پر سوالات اٹھائے جا رہے ہیں، کیونکہ بھارتی کرکٹ بورڈ اور اس کے اسپانسرز اپنی مالی برتری کا فائدہ اٹھا کر فیصلوں پر اثر انداز ہو رہے ہیں۔
یہ تنازع ظاہر کرتا ہے کہ کرکٹ جیسے کھیل میں سفارتی اور مالی معاملات نے کھیل کے شفافیت اور وقار کو متاثر کیا ہے۔ 7 دسمبر کی میٹنگ میں چیمپیئنز ٹرافی کے مستقبل اور آئی سی سی کے فیصلے کے حوالے سے اہم پیش رفت متوقع ہے۔
