لاہور۔پاکستانی شوبز انڈسٹری کی معروف اداکارہ ماہرہ خان اور سپر اسٹار ہمایوں سعید کی نئی رومانوی فلم "لو گُرو” کا ٹریلر منظرِ عام پر آ گیا ہے۔
فلم بینوں کے لیے یہ ایک خوش آئند خبر ہے کہ ماہرہ اور ہمایوں ایک مرتبہ پھر سلور اسکرین پر ساتھ نظر آئیں گے، اور اس بار وہ فلم "لو گُرو” میں رومانوی کرداروں میں جلوہ افروز ہوں گے۔
یہ فلم عیدالاضحیٰ کے موقع پر ریلیز کی جائے گی۔ اس کی پروڈکشن ہمایوں سعید، شہزاد نصیب اور جرجیس سیجا نے انجام دی ہے، جبکہ فلم کے زیادہ تر مناظر لندن میں عکس بند کیے گئے ہیں۔
معروف مزاحیہ و رومانوی کہانیاں لکھنے والے واسع چوہدری نے اس فلم کا اسکرپٹ تحریر کیا ہے۔ وہ اس سے قبل "جوانی پھر نہیں آنی” سیریز کے مصنف بھی رہ چکے ہیں۔
ٹریلر کو شائقین کی جانب سے بھرپور پذیرائی ملی ہے اور اب لوگ بےچینی سے فلم کی ریلیز کا انتظار کر رہے ہیں۔ یہ فلم 6 جون 2025 کو پاکستان بھر کے سینما گھروں میں نمائش کے لیے پیش کی جائے گی۔
