اسلام آباد۔۔۔۔۔۔۔ وزیر اعظم عمران خان نے ملک میں سمارٹ ، خود کفیل، صاف ستھرے اور سبز مکانات اور کاروباری منصوبوں کے فروغ کے لیے راوی اربن ڈویلپمنٹ اتھارٹی ( روڈا ) اور سنٹرل بزنس ڈسٹرکٹ ( سی بی ڈی ) کی اہمیت پر زور دیا ہے ۔ وزیر اعظم عمران خان کی زیرصدارت راوی اربن ڈویلپمنٹ اتھارٹی اور سنٹرل بزنس ڈسٹرکٹ ، والٹن سے متعلق جائزہ اجلاس منعقد ہوا۔وزیر اعظم آفس کے میڈیا سیل کے مطابق روڈا کے مختلف منصوبوں میں شمسی توانائی سے چلنے والا قابل تجدید بجلی پیدا کرنے والے پلانٹ کی تنصیب ، خصوصی اقتصادی زونز اور خصوصی ٹیکنالوجی زونز کا قیام ، فیری آپریشنز کا آغاز ، نالج پارک اور رکھ جھک فارمز کا قیام شامل ہیں۔ یہ تمام منصوبے اپنی مالی ضروریات کے حوالے سے خود مختار ہوں گے، تاکہ ان کی پائیداری کو یقینی بنایا جا سکے۔اجلاس میں وزیراعظم کو آئی ایم جی دبئی تھیم پارک کے اشتراک سے پاکستان کا سب سے بڑا تھیم پارک بنانے کےمنصوبے پر بھی بریفنگ دی گئی۔ اس موقع پر بتایا گیا کہ راوی ریور فرنٹ پر 2000 کنال اراضی پر بنایا جانے والایہ منصوبہ روڈا سرمایہ کاروں کو راغب کرنے کے لیے آئندہ ماہ شروع ہونے والی دبئی ایکسپو 2020 میں نمائش کے لیے پیش کرے گا۔وزیراعظم نے ملک میں سمارٹ ، خود کفیل، صاف ستھرے اور سبز مکانات اور کاروباری منصوبوں کے فروغ کے لیے روڈااور سی بی ڈی کی اہمیت پر زور دیا۔انہوں نے متعلقہ حکام کو ہدایت کی کہ وہ ایک فعال حکمت عملی اپناتے ہوئے مسائل کو حل کریں تاکہ پاکستان براہ راست غیر ملکی سرمایہ کاری کو راغب کرکے ان جدید اور پائیدار رئیل اسٹیٹ منصوبوں سے زیادہ سے زیادہ فوائد حاصل کر سکے۔
