اسلام آباد ( یو این آئی نیوز) وفاقی وزیرخزانہ ومحصولات شوکت فیاض ترین نے کہاہے کہ عالمی اقتصادی فورم نے پاکستان کی معاشی پیش رفت کی تائید وتوثیق کی ہے۔جمعہ کواپنی ٹویٹ میں انہوں نے کہاہے کہ عالمی اقتصادی فورم کے کنٹری شراکت دارمشال نے پاکستان کے حوالہ سے اپنی مسابقتی رپورٹ میں معاشرے کے معاشی طورپرکمزورطبقات کے معیارزندگی کو بہتربنانے کی کوششوں کا اعتراف کیاہے۔ اس رپورٹ میں بتایا گیاہے کہ احساس پروگرام کے ذریعہ پاکستان کی حکومت نے انسانی وقار اورسماجی سرمایہ کے اقدار پرمبنی اقدامات پر زوردیا اوراس حوالہ سے پاکستان نے قائدانہ نوعیت کا کرداراداکیاہے۔انہوں نے کہاکہ عالمی اقتصادی فورم نے پاکستان کی مستقبل کی ترجیحات پرمبنی پالیسیوں کا بھی اعتراف کیا ہے،عالمی اقتصادی فورم کا کہنا ہے کہ تخفیف غربت، یونیورسل ہیلتھ کئیر، ماحولیاتی تحفظ، انسانی وسائل وسرمایہ میں بہتری اوربدعنوانی کے سدباب کیلئے اقدامات کے ضمن میں پاکستان کی حکومت نے قائدانہ کردار اداکیاہے۔ وزیرخزانہ نے کہاہے کہ مختصر اورطویل المیاد پالیسی سازی کے حوالہ سے پاکستان کے سکور میں نمایاں اضافہ ہواہے۔وزیرخزانہ نے کہاکہ دنیانے کوویڈ 19 کے حوالہ سے سمارٹ لاک ڈاون پرمبنی پالیسی کی تائید کی ہے۔پاکستان کی حکومت نے انسانی جانوں اورکاروبارکے تحفظ پرمبنی پالیسیاں اپنائی ہیں جس کے اچھے نتائج سامنے آرہے ہیں۔
