راولپنڈی ( یو این آئی نیوز) اٹلی کے سیکرٹری جنرل آف ڈیفنس اینڈ نیشنل آرمامنٹس کے ڈائریکٹر لیفٹیننٹ جنرل لوسیانو پورٹولانو نے گذشتہ روز یہاں چیف آف آرمی سٹاف جنرل قمر جاوید باجوہ سے ملاقات کی۔آئی ایس پی آر کے مطابق ملاقات کے دوران باہمی دلچسپی کے امور، افغانستان کی حالیہ پیش رفت سمیت علاقائی سلامتی کی صورتحال اور بالخصوص تربیت اور انسداد دہشت گردی کے شعبوں میں فوجی تعاون بڑھانے کے حوالے سے تبادلہ خیال کیا گیا۔ آرمی چیف جنرل قمر جاوید باجوہ نے اس موقع پر کہا کہ پاکستان عالمی اور علاقائی معاملات میں اٹلی کے کردار کو قدر کی نگاہ سے دیکھتا ہے اور اس کے ساتھ اپنے دوطرفہ تعلقات کو بڑھانے کے خواہاں ہے۔ انھوں نے افغانستان میںانسانی تباہی کو روکنے کے لیے افغانستان کو انسانی امداد پہنچانے کے لیے فوری طور پرعالمی سطح پر ادارہ جاتی طریقہ کار وضع کرنے کی ضرورت پر بھی زور دیا۔ انہوں نے زور دے کر کہا کہ ’’افغانستان میں امن کا مطلب پاکستان میں امن ہے‘‘۔معزز مہمان نے پاکستان کی مسلح افواج کی پیشہ ورانہ مہارت کو تسلیم کیا اور مختلف شعبوں میں تعاون بڑھانے کے عزم کا اظہار کیا۔ انہوں نے افغان صورتحال ، بارڈر مینجمنٹ کے لیے خصوصی کوششوں اور علاقائی استحکام میں پاکستان کے کردار کو سراہا۔
