راولپنڈی ( یو این آئی نیوز)پاکستان میں کینیڈین ہائی کمشنر وینڈی گلمور نےآج جی ایچ کیو میں آرمی چیف جنرل قمر جاوید باجوہ سے ملاقات کی۔آئی ایس پی آر کے مطابق ملاقات میں باہمی دلچسپی کے امور ، مختلف شعبوں میں دوطرفہ تعاون ، مجموعی علاقائی صورتحال اور افغانستان میں امن و استحکام پر تبادلہ خیال کیا گیا۔ آرمی چیف نے کہا کہ پاکستان دوطرفہ تعلقات کی روایت کو برقرار رکھنا چاہتا ہے اور کینیڈا کے ساتھ طویل مدتی اور کثیر الجہتی پائیدار تعلقات کی خواہش رکھتا ہے۔ آرمی چیف نے اس بات کا اعادہ کیا کہ افغانستان میں عالمی سطح پر ہم آہنگی کی ضرورت ہے تاکہ افغان عوام کی معاشی ترقی کے لیے مربوط کوششوں کے ساتھ مل کر انسانی بحران سے بچا جا سکے۔ کینیڈین ہائی کمشنر نے افغانستان میں امن واستحکام بلخصوص غیر ملکیوں کے انخلاء کے لیے کامیاب آپریشن کے حوالے سے پاکستان کے کردار کو سراہا اور دونوں ممالک کے درمیان بہتر تعلقات کے لیے کام جاری رکھنے کا عہد کیا۔
