اسلام آباد ( یو این آئی نیوز)بین الاقوامی سائبر وارفیئر اینڈ سیکیورٹی کانفرنس اسلام آباد میں اختتام پذیر ہو گئی ۔ جناب شفقت محمود، وفاقی وزیر تعلیم اس اختتامی کانفرنس کے مہمانِ خصوصی تھے۔ ترجمان پاک فضائیہکے مطابق ایئرمارشل نعمان علی، وائس چیف آف دی ایئرسٹاف ، ایئرمارشل (ریٹائرڈ) جاوید احمد ،وائس چانسلر ایئر یونیورسٹی اور ایئر وائس مارشل عباس گھمن، ڈایریکٹر جنرل C4I نے معزز مہمان گرامی کی آمد پر ان کا استقبال کیا۔ سول و عسکری عہدے دار ، تعلیمی اداروں کے اعلٰی عہدے دار، تھنک ٹینک اور سائبرانڈسٹری کے نمائندوں کی ایک بڑی تعداد نے اس تقریب میں شمولیت اختیار کی۔ وفاقی وزیر تعلیم جناب شفقت محمود نے تقریب سے خطاب کرتے ہوئے کہا کہ ملک مسلسل سائبرحملوں کا سامناکررہا ہے اور ایک مضبوط سائبرسکیورٹی کی اہمیت آج کی ایک مسلمہ حقیقت ہے۔ وفاقی وزیر نے سائبر وارفیئر پر بین الاقوامی کانفرنس کے کامیاب انعقاد اور سائبر سیکیورٹی انڈسٹری نمائش کے انعقاد پر پی اے ایف اور ایئر یونیورسٹی کی کاوشوں کو سراہتے ہوئے کہا کہ نمائش میں سائبر انڈسٹری کے سرکردہ نمائندوں کی موجودگی ملک میں جدید ٹیکنالوجی لانے میں مدد دے گی۔ وفاقی وزیر نے سائبر سیکیورٹی اکیڈمی کے قیام اور تکنیکی چیلنجز سے نبرد آزما ہونے کے لیے ایئر یونیورسٹی کی سرپرستی کرنے پر پاک فضائیہ کے کردار پر مسرت کا اظہار کیا۔ سربراہ پاک فضائیہ کے وژن کے تحت پاک فضائیہ نے نیشنل سائبر سیکیورٹی کے مقاصد کے حصول کے لیے متعدد اقدامات کیے ہیں۔ صنعت اور تعلیم کے مضبوط روابط کے ذریعے، پاک فضائیہ سائبر سیکیورٹی کے شعبے میں جدید تحقیق کرنے والی اعلیٰ معیار کی افرادی قوت کی ترقی پر یقین رکھتی ہے۔ اعلیٰ تعلیم کی حامل افرادی قوت نیشنل ایرو اسپیس سائنس اینڈ ٹیکنالوجی پارک (NASTP) کے تحت کام کرنے والے سائبر ٹیکنالوجی پارک اور سائبر سینٹر آف ایکسی لینس میں تحقیق اور ترقی کے لیے کوشاں رہے گی۔ خود کو ایک موثر اور انتہائی ذمہ دار سائبر فورس کے طور پر تیار کرتے ہوئے، پاک فضائیہ نے ممکنہ خطرات سے نبٹنے کے لیے اپنے سائبر انفراسٹرکچر کو مزید بہتر بنایا ہے۔ پاک فضائیہ اپنے سائبر وارفیئر اور سیکیورٹی کے مقاصد کو حاصل کرنے کے لیے ایک طاقتورعنصر کے طور پرایک مضبوط سائبر کمانڈ بھی قائم کر رہا ہے۔اس موقع پر وائس چیف آف دی ائیر سٹاف نے مہمان خصوصی کو پاک فضائیہ کے ملکی اور غیر ملکی ٹیکنالوجی ماہرین کے تعاون سے جاری مختلف اقدامات کے بارے بھی آگاہ کیا۔
