راولپنڈی ( یو این آئی نیوز) امریکہ کی ہاؤس فارن افیئرز کمیٹی (ایچ ایف اے سی) کے چیرمین گریگوری ویلڈن میکس کی سربراہی میں اور ممبر ایچ ایف اے سی مسٹر امریش بابولال بیرا،(چیئرمین سب کمیٹی برائے ایشیا پیسیفک، وسطی ایشیا اور عدم پھیلاؤ) پر مشتمل وفد نے گذشتہ روز یہاں چیف آف آرمی سٹاف جنرل قمر جاوید باجوہ سے ملاقات کی۔ آئی ایس پی آر کے مطابق ملاقات میں باہمی دلچسپی کے امور، افغانستان کی موجودہ سیکیورٹی صورتحال اور مختلف شعبوں میں دوطرفہ تعاون پر تبادلہ خیال کیا گیا۔ اس موقع پر آرمی چیف نے کہا کہ پاکستان تمام علاقائی پارٹنرز کے ساتھ دو طرفہ روابط کی روایت کو برقرار رکھنے اور خطے میں پائیدار امن کا خواہاں ہے۔ انھوں نے انسانی بحران سے بچنے اور افغان عوام کی معاشی ترقی کے لیے مربوط کوششوں کے لیے افغانستان پر عالمی اتحاد کی ضرورت کا اعادہ کیا۔ انہوں نے ایک بار پھر زور دے کر کہا کہ “افغانستان میں امن کا مطلب پاکستان میں امن ہے”۔ معزز مہمانؤں نے افغان صورتحال میں پاکستان کے کردار، موثر بارڈر مینجمنٹ کے لیے خصوصی کاوشوں، علاقائی استحکام میںبھی پاکستان کے کردار کو سراہا اور پاکستان کے ساتھ ہر سطح پر سفارتی تعاون میں مزید بہتری کے لیے اپنا کردار ادا کرنے کا عہد کیا۔
