اسلام آباد(یو این آئی نیوز):
عسکری قیادت کے اجلاس میں دفاعی تیاریوں پر مکمل اطمینان اور تمام خطرات کا بھرپور جواب دینے کے عزم کا اعادہ کیا ہے۔آئی ایس پی آرکی طرف سے جاری کردہ بیان کے مطابق دفاع اور سلامتی سے متعلق سروس چیفس کا اجلاس جوائنٹ اسٹاف ہیڈ کوارٹرز میں ہوا۔چیئرمین جوائنٹ چیفس آف سٹاف کمیٹی جنرل ندیم رضا اجلاس کی صدارت کی، اجلاس میں آرمی چیف جنرل قمر جاوید باجوہ، چیف آف نیول سٹاف ایڈمرل امجد خان نیازی اور ایئر چیف مارشل ظہیر احمد بابر سدھو نے شرکت کی۔
اجلاس کے دوران فورم کو مغربی سرحد، خیبرپختونخوا اور بلوچستان سے متعلق قومی سلامتی کی صورتحال سے تفصیلی بریفنگ دی گئی جبکہ اسٹریٹجک اور روایتی پالیسیوں کے دائرے میں تیز رفتار پیشرفت، خطے میں پائیدار ترقی کیلئے افغانستان میں امن کی اہمیت اور مسلح افواج کی آپریشنل تیاریوں پر تبادلہ خیال کیا۔آئی ایس پی آر کے مطابق اجلاس کے دوران فورم نےدفاعی افواج کی تیاریوں پر مکمل اطمینان اور اعتماد کا اظہار کیا۔ شرکا نے مسلح افواج کے ایک جامع سیکیورٹی حکمت عملی کے مطابق انتہائی موزوں انداز میں تمام خطرات کا بھرپور جواب دینے کے عزم کا اعادہ بھی کیا۔فورم نے دہشت گردی کے خلاف جنگ میں سیکیورٹی اداروں کی قربانیوں کو بھی سراہا۔
