اسلام آباد(یو این آئی نیوز)صدرمملکت عارف علوی نے کہا ہے کہ بچوں کا عالمی دن منانے کا مقصد بچوں اور انکے حقوق کے تحفظ کے عزم کا اعادہ کرنا ہے،آج ہم اپنے بچوں کیلئے ایک بہتر مستقبل کی تعمیر کا عزم کرتے ہیں،حکومت ہر بچے کو غربت اور ہر قسم کے تشدد سے محفوظ بنانے کیلئے پرعزم ہے،ہر بچے کو معیاری تعلیم اور صحت کی سہولیات فراہم کرنے کیلئے کام کر رہے ہیں۔ہفتہ کو ایوان صدرمیڈیا ونگ سے جاری ہونے والی پریس ریلیز کے مطابق بچوں کے عالمی دن کے موقع پر اپنے پیغام میں صدر مملکت عارف علوی نے کہا ہے کہ ہم یقینی بنا رہے ہیں کہ کسی بچے سے اس کی قومیت، مذہب يا صنف کی بنیاد پر تفریق نہ کی جائے،انہوں نے کہا کہ آج ہم اپنے بچوں کو ماحولیاتی تبدیلی کے شدید اثرات سے بچانے کا بھی عزم کرتے ہیں۔صدر مملکت نے کہا کہ پاکستانی بچوں کی بہتر زندگی کیلئے میڈیا، معاشرے، والدین اور خود بچوں کو بھی مل کر تعمیری کردار ادا کرنا ہو گا،آئیں وبا پر قابو پا کر ہر بچے کیلئے بعد از وبا ایک بہتر مستقبل کیلئے کام کریں۔
