اسلام آباد ( یو این آئی نیوز )وفاقی وزیر اطلاعات و نشریات چوہدری فواد حسین نے کہا ہے کہ وزیراعظم نے پارٹی قیادت کو عوامی رابطہ مہم شروع کرنے کی ہدایت کی ہے، حکومت مہنگائی کے مسئلہ سے نمٹنے کے لئے ہمہ جہت ہے، وزیراعظم نے متوسط طبقہ کو ریلیف کی فراہمی کے لئے فوری اقدامات اٹھانے اور احساس پروگرام کی سبسڈی سکیم کو بڑھانے کی ہدایت کی، سندھ حکومت کی جانب سے گندم کے اجراءمیں مسلسل تاخیر کے باعث سندھ میں 20 کلو آٹے کا تھیلا پنجاب اور خیبر پختونخوا کی نسبت 400 روپے زیادہ مہنگا ہے، اس سال گنے کی تاریخی پیداوار ہونے کی توقع ہے، کاٹن کی پیداوار گزشتہ سال کی نسبت 60 فیصد زیادہ ہے، آٹے کی قیمت میں مسلسل کمی دیکھی جا رہی ہے، کرشنگ سیزن شروع ہوگا تو چینی کی قیمت بھی مزید کم ہوگی۔ ان خیالات کا اظہار انہوں نے بدھ کو یہاں پاکستان تحریک انصاف کی کور کمیٹی کے اجلاس کے بعد بریفنگ دیتے ہوئے کیا۔
وفاقی وزیر اطلاعات نے کہاکہ وزیراعظم عمران خان کی زیر صدارت پاکستان تحریک انصاف کی کور کمیٹی کے اجلاس میں پنجاب، خیبر پختونخوا اور سندھ سے پی ٹی آئی کی لیڈر شپ نے شرکت کی، اجلاس میں پنجاب میں مقامی حکومتوں کے انتخابات کے حوالے سے سب سے اہم موضوع پر گفتگو ہوئی۔
چوہدری فواد حسین نے کہا کہ وزیراعظم نے پارٹی لیڈر شپ کو عوامی رابطہ مہم شروع کرنے کی ہدایت کی۔ وزیراعظم نے کہا کہ مقامی حکومتوں کے انتخابات کی تیاری کے لئے شہروں اور اضلاع میں شیڈول جاری کئے جائیں۔
وفاقی وزیر اطلاعات نے بتایا کہ کور کمیٹی کے اجلاس سے پہلے وزیراعظم نے احساس پروگرام کے حوالے سے اجلاس کی صدارت کی، اجلاس میں مشیر خزانہ شوکت ترین نے بذریعہ زوم جبکہ احساس پروگرام کی چیئرپرسن ڈاکٹر ثانیہ نشتر، پنجاب اور خیبر پختونخوا کے وزراءخزانہ سمیت چیف سیکریٹریز اور سینئر بیورو کریٹس نے شرکت کی۔
وفاقی وزیر اطلاعات نے کہا کہ وزیراعظم نے متوسط طبقہ کو ریلیف کی فراہمی کے لئے فوری اقدامات کی ہدایت کی۔ وزیراعظم نے احساس پروگرام کی سبسڈی سکیم کو بڑھانے کی بھی ہدایت کی۔ انہوں نے کہا کہ خیبر پختونخوا اور پنجاب احساس پروگرام کی سبسڈی سکیم میں حصہ دار بننے کو تیار ہیں۔ ہم چاہتے ہیں کہ سندھ اور بلوچستان بھی اس سبسڈی سکیم میں حصہ دار بنیں۔ گلگت بلتستان اور کشمیر نے اس میں دلچسپی کا اظہار کیا ہے۔
وفاقی وزیر اطلاعات نے کہا کہ سندھ حکومت کی جانب سے گندم کے اجراءمیں مسلسل تاخیر کے باعث سندھ میں 20 کلو آٹے کا تھیلا پنجاب اور خیبر پختونخوا کی نسبت 400 روپے زیادہ مہنگا ہے۔ انہوں نے کہا کہ ہم سندھ حکومت پر مسلسل زور دے رہے ہیں کہ گندم کی ریلیز کو بڑھایا جائے تاکہ سندھ میں آٹے کی قیمت میں کمی ہو۔ انہوں نے کہا کہ اس سال گنے کی تاریخی پیداوار متوقع ہے، کاٹن کی پیداوار گزشتہ سال کی نسبت 60 فیصد زیادہ ہے۔
وفاقی وزیر اطلاعات نے کہا کہ آٹے کی قیمت میں مسلسل کمی دیکھی جا رہی ہے، کرشنگ سیزن شروع ہوگا تو چینی کی قیمت مزید کم ہوگی۔ انہوں نے کہا کہ دالوں، سبزیوں، چینی اور آٹے کی قیمتوں میں کمی کا رجحان ہے۔ اگر یہ رجحان برقرار رہا تو پٹرولیم مصنوعات کی قیمتوں میں اضافے کی وجہ سے عوام کو درپیش مشکلات میں کچھ ریلیف ملے گا، حکومت مہنگائی کے مسئلہ سے نمٹنے کے لئے ہمہ جہت ہے، وزیراعظم آنے والے دنوں میں بڑے پروگراموں کا اعلان کریں گے۔
