اسلام آباد( یو این آئی نیوز) وزیر اعظم عمران خان نے کہاہے کہ سرکاری اراضی پر ناجائز تجاوزات کو خالی کرایا جائے،صوبائی حکومتیں ناجائز تجاوزات کے لیے قانون سازی کے عمل کو جلد مکمل کریں۔ان خیالات کا اظہار انہوں نے قومی رابطہ کمیٹی برائے ہاوسنگ، کنسٹرکشن و ڈیویلپمنٹ کے اجلاس کی صدارت کرتے ہوئے کیا۔اجلاس میں مشیر خزانہ شوکت ترین، وزیر مملکت فرخ حبیب، معاونین خصوصی ملک امین اسلم، ڈاکٹر شہباز گل، چیرمین ایف بی آر، سروئیر جنرل آف پاکستان، چیرمین نیا پاکستان ہاوسنگ و ڈویلپمنٹ اتھارٹی، وفاقی اور صوبائی حکومتوں کے سینیئر افسران شریک تھے۔اجلاس میں سروئیر جنرل آف پاکستان نے اجلاس میں ملک میں جاری کیڈسٹرل میپنگ کے حوالے سے تفصیلی بریفنگ دیتے ہوئے بتایا کہ سرکاری اراضی کی 88 فیصد میپنگ مکمل کر لی گئی ہے۔تاحال مکمل میپنگ سے ہزاروں ایکڑ سرکاری اراضی پر ناجائز تجاوزات کی نشاندہی ہوئی ہے۔ان تجاوزات کی مالیت کھربوں روپے بنتی ہے۔کیڈسٹرل میپنگ سے سرکاری اراضی کا اصل رقبہ اور ملکیت ڈیجیٹل ریکارڈ کا حصہ بن جائیں گے۔اجلاس میں بتایا گیا کہ سب سے زیادہ نا جائز تجاوزات جنگلات کی اراضی پر بنائی گئی ہیں۔واپڈا، نیشنل ہائی وے اتھارٹی، سول ایویشن اور ریلوے کی زمینوں پر بھی ناجائز تجاوزات قائم کی گئی ہیں۔ اگلے مرحلے میں پرائیوٹ اراضیوں کی ڈیجیٹائز یشن کا عمل صوبائی حکومتوں کی مدد سے مکمل کیا جائے گا۔ وزیر اعظم نےسروے آف پاکستان کی کیڈسٹرل میپنگ پر ستائش اور اطمینان کا اظہار کیا۔انہوں نے کہاکہ تمام صوبے کیڈیسٹرل میپنگ کے ڈیٹا کی سروے آف پاکستان کے ساتھ دو مہینوں میں تصدیق کے عمل کو مکمل کریں۔ وزیر اعظم نے ہدایت کی کہ صوبائی حکومتیں اور اسلام آباد کیپیٹل ٹیریٹری ناجائز تجاوزات کے خلاف زیر التوا مقدمات کی موثر پیروی کریں۔انہوں نے کہاکہ ناجائز تجاوزات کو ختم کر کے واگزار اراضی پر جنگلات اگانے کا منصوبہ بنایا جائے۔۔۔
