اسلام آباد (یو این آئی ):
نگراں وفاقی وزیر برائے انسانی حقوق خلیل جارج سے پاکستان میں ایران کے سفیر رضا امیری مغدام نے ان کے دفتر میں ملاقات کی۔ ملاقات میں انسانی حقوق کے شعبہ میں تعاون بڑھانے پر اتفاق کیا گیا۔
منگل کو وزارت انسانی حقوق سے جاری پریس ریلیز کے مطابق نگراں وفاقی وزیر نے ایرانی سفیر کو پاکستان میں انسانی حقوق کے حوالے سے آگاہ کرتے ہوئے کہا کہ پاکستان کی تمام عوام بابائے قوم قائداعظم محمد علی جناح کے وژن اور آئین پاکستان کے مطابق مذہبی، سیاسی، سماجی اور معاشی طور پر مکمل آزاد ہیں، ملک میں انسانی حقوق کی پامالیوں کو روکنے کے لیے فعال عدالتی نظام موجود ہے، پاکستانی شہری ملک کے کسی بھی کونے سے انسانی حقوق کی پامالی کو روکنے کے لیے وزارت انسانی حقوق کے ٹول فری نمبر پر شکایات درج کرسکتے ہیں۔
انھوں نے کہا کہ پاکستان اور ایران کا رشتہ کافی پرانا ہے، ہمارا مذہب، روایات اور اقدار ایک ہیں، پاکستان ایران نے ہمیشہ مشکل وقت میں ایک دوسرے کا ساتھ دیا۔ انھوں نے کہا کہ پڑوسی ملک بھارت میں کشمیریوں اور دوسری اقلیتوں کے ساتھ انتہائی ناروا سلوک روا رکھا جاتاہے جس پر بین الاقوامی میڈیا کی خاموشی قابل تشویش ہے۔
ایرانی سفیر نے کہا کہ انسانی حقوق کے حوالے سے پاکستان کا بین الاقوامی اداروں کے ساتھ کافی اچھا تجربہ ہے، انسانی حقوق کے حوالے سے پاکستان کے تجربات سے استفادہ حاصل کریں گے۔ نگراں وفاقی وزیر نے ایرانی سفیر کا وزارت انسانی حقوق کا دورہ کرنے پر شکریہ ادا کیا اور ایک دوسرے کو سونئیر پیش کیے۔
