اسلام آباد ( یو این آئی نیوز): فارن فنڈنگ کیس میں پاکستان تحریک انصاف کو تفصیلات جمع کرانے کے لیے 6 ہفتوں کی مہلت مل گئی۔
پی ٹی آئی غیر ملکی فنڈنگ کیس کی سماعت چیف الیکشن کمشنر کی سربراہی میں اسلام آباد میں ہوئی۔
تحریک انصاف کے وکیل کی جانب سے الیکشن کمیشن میں غیر ملکی فنڈنگ کیس سے متعلق عبوری جواب جمع کرایا گیا، 4 افراد کے نائیکاپ اور ویڈیوز بھی جمع کرائی گئی ہیں۔
پی ٹی آئی کے وکیل شاہ خاور نے کمیشن سے استدعا کی ہمیں مزید مہلت چاہیے، 10 سال پرانا کیس ہے، بیرون ملک چیپٹر سے تفصیلات اکھٹی کرنی ہیں، ہمیں کم از کم 8 ہفتے درکار ہیں۔
شاہ خاور نے مزید کہا کہ لوگوں نے بیان دیا ہےکہ وہ پاکستانی ہیں، فیصلے میں غیر ملکی ظاہر کیا گیا تھا۔
چیف الیکشن کمشنر نے کہا کہ آپ سے تو ہمارا سوال تھا کہ ہم رقم ضبط کیوں نہ کر لیں،آپ کو اس پر جواب دینا ہے، ہمارے قانون کے مطابق غیر ملکی کمپنی سے پیسے نہیں آ سکتے، فارا کے تحت کمپنی آپ نے امریکا کے قانون کے تحت رجسٹر کی۔
پی ٹی آئی کے وکیل نے کہا کہ ہمیں 6 ہفتے دے دیں جس پر چیف الیکشن کمشنر نے ریمارکس دیے کہ پہلے ہی بہت وقت لگ گیا ہے، آپ کو 6 ہفتے کی مہلت دے رہے ہیں۔
چیف الیکشن کمشنر کا کہنا تھاکہ امریکہ میں رجسٹرڈ کمپنی غیرملکی کمپنی ہی ہوگی۔امریکی قانون کیساتھ پاکستانی قانون پر بھی عمل کرنا ہے۔
اگر فیصلے پر اعتراض ہے تو اسے چیلنج کر دیں، فیصلے میں کوئی غلطی ہے تو اسکی تصحیح کر سکتے ہیں۔
شاہ خاور کا کہناتھاکہ مزید ریکارڈ آ جائے تو کمیشن کے ہر سوال جا جواب دے سکیں گے۔ جہاں اتنا وقت گزار ہے مزید دو ماہ بھی دیدیں۔
چیف الیکشن کمشنر کہنا تھاکہ پہلے بھی ہفتوں کی بات کرتے کرتے آٹھ سال لگ گئے ہیں۔چار ہفتے سے زیادہ کا وقت نہیں دے سکتے۔
