ژوب(یو این آئی)امیر جماعت اسلامی سراج الحق سراج الحق پر بلوچستان کے علاقے ژوب میں خود کش حملہ کیاگیا تاہم اس حملے میں سراج الحق بال بال بچ گئے۔وزیر اعظم شہباز شریف،وزیر خارجہ بلاول بھٹو زرداری ،مریم نواز اور عمران خان نے حملے کی شدید الفاظ میں مذمت کی ہے اور امیر جماعت اسلامی کے لئے نیک خواہشات کا اظہار کیا۔
ترجمان جماعت اسلامی قیصر شریف کے مطابق امیر جماعت اسلامی سراج الحق جلسے سے خطاب کیلئے بلوچستان کے علاقے ژوب جارہے تھے جہاں شہر میں داخلے سے قبل ان کے قافلے پر خودکش حملہ کیا گیا
ذرائع کے مطابق دھماکے میں ابتدائی طور پر 5 افراد کے زخمی ہونے کی اطلاعات ہیں، واقعے کے بعد سیکیورٹی فورسز اور امدادی ٹیمیں جائے وقوعہ کی جانب روانہ ہوگئیں، دھماکے میں ہلاکتوں کا بھی خدشہ ہے
ترجمان جماعت اسلامی کے مطابق آج جماعت اسلامی کا ژوب میں جلسہ تھا، انتظامیہ کی جانب سے جلسے سے قبل کوئی الرٹ جاری نہیں کیا گیا تھا، تمام حالات نارمل تھے جلسے کے انتظامات بھی مکمل تھے
اسسٹنٹ کمشنر ژوب حافظ طارق کا کہنا ہے کہ دھماکے میں متعدد افراد کے زخمی ہونے کی اطلاع ہے، امیر جماعت اسلامی سراج الحق دھماکے میں محفوظ رہے، حملے میں معمولی نوعیت کے زخمی ہونے کی اطلاعات ہیں۔
دھماکے کی ایک ویڈیو بھی منظر عام پر آئی ہے جس میں دیکھا جاسکتا ہے کہ امیر جماعت اسلامی سراج الحق کی گاڑی کے قریب کارکنوں کی بڑی تعداد جمع ہے، اس دوران زور دار دھماکا ہوا ہے اور لوگ خوفزدہ ہوکر بھاگتے ہوئے نظر آتے ہیں۔
