اسلام آباد( یو این آئی نیوز )پاکستان ڈیمو کریٹک موومنٹ(پی ڈی ایم) کے سربراہ مولانا فضل الرحمان نے کہا ہے کہ مہنگائی کے خلاف احتجاجی تحریک کا اعلان کرتے ہوئے ، غریب آدمی خود کشیوں پر مجبور ہے جبکہ مہنگائی کے خلاف ملک بھر میں تحریک چلائیں گے۔پاکستان مسلم لیگ(ن) کے صدرمیاں شہباز شریف اور پاکستان ڈیمو کریٹک موومنٹ(پی ڈی ایم) کے سربراہ مولانا فضل الرحمان کے درمیان ٹیلی فونک رابطہ ہوا جس میں مہنگائی کے خلاف ملک گیر تحریک چلانے کا فیصلہ کیا گیا۔اس حوالے سے اسلام آباد میں پی ڈی ایم کے سربراہ مولانا فضل الرحمان نے میڈیا سے گفتگو کرتے ہوئے کہا کہ آئے روز مہنگائی کے بم گرائے جارہے ہیں، مہنگائی کے خلاف ملک گیر تحریک چلائی جائے گی ،پہلا مرحلہ مکمل ہونے پر پی ڈی ایم آئندہ کے لائحہ عمل کا اعلان کرے گی۔ٹیلی فونک گفتگوکے دوران شہبازشریف اور مولانا فضل الرحمان نے قوم کو مسائل اور معاشی تباہی سے نجات دلانے کیلئے سڑکوں پر آنے پر اتفاق کیا۔ دونو ں رہنمائوں نے ملک کی دیگر اپوزیشن جماعتوں کو بھی ساتھ ملانے کا فیصلہ کیا اور اس بات پر اتفاق کیا کہ قوم کو مہنگائی، بے روزگاری اور معاشی تباہی سے نجات دلانے کے لئے گھروں سے نکلنا ہوگا۔
