اسلام آباد(یو این آئی نیوز ) بھارت میں کورونا ایک بار پھر بے قابو، مودی حکومت کی ناقص حکمت عملی کے باعث بھارت میں نئے کیسز کی تعداد میں مسلسل اور تیزی سے اضافہ ہو رہا ہے۔ بھارتی میڈیا کی رپورٹ کے مطابق گزشتہ 24 گھنٹوں کے دوران ملک میں کورونا انفیکشن کے 2 لاکھ 68 ہزار 833 نئے کیسز سامنے آئے جس کے بعد بھارت میں ایکٹو کیسز کی مجموعی تعداد 14 لاکھ 17 ہزار 820 تک پہنچ گئی ہے۔بھارتی حکومت کا دعوی ہے کہ جمعہ کے روز 58 لاکھ دو ہزار 976 کووڈ ٹیکے لگائے گئے اور ہفتہ کی صبح 7 بجے تک موصولہ اعداد و شمار کے مطابق ملک میں اب تک ایک ارب 56 کروڑ دو لاکھ 51 ہزار 117 ٹیکے لگائے جا چکے ہیں۔
مرکزی وزارت صحت کی طرف سے جاری کردہ اعداد و شمار کے مطابق بھارت میں متاثرہ افراد کی مجموعی تعداد بڑھ کر تین کروڑ 68 لاکھ 50 ہزار 962 ہو گئی ہے ۔جبکہ 24گھنٹوں میں 402 مریضوں کی موت ہونے کے بعد مرنے والوں کی کل تعداد بڑھ کر 4,85,752 ہو گئی ہے۔
