اسلام آباد(یو این آئی نیوز ) بھارتی آرمی چیف جنرل ایم ایم نرونے نے ہفتے کو ایک بار پھر پاکستان پر دہشت گردوں کو پناہ دینے کا گھیسا پیٹا الزام لگاتے ہوئے کہا کہ سرحد پار تربیتی کیمپوں میں تقریبا 300-400دہشت گرد جموں۔کشمیر میں دراندازی کرنے کے موقع کے انتظار میں ہیں۔ بھارتی میڈیا کے مطابق جنرل نرونے نے نئی دہلی میں کریپا پریڈ گراونڈ میں آرمی ڈے کے موقع پر اپنے خطاب میں کہاکہ سرحد پار تربیتی کیمپوں میں تقریبا 300-400دہشت گرد جموں۔کشمیر میں دراندازی کرنے کے موقع کا انتظار کررہے ہیں لیکن کنٹرول لائن پر فوجی مہمات اور فوج کے مضبوط انسداد دراندازی گرڈ نے کئی کوششوں کو ناکام بنا دیا ہے۔ انہوں نے کہاکہ ڈرون کے ذریعہ ہتھیاروں کی اسمگلنگ کے لئے بھی سرحد پار سے کوشش کی جارہی ہے۔انہوں نے کہاکہ ہندستان فوج سرحدوں پر حالات کو یکطرفہ بدلنے کی کوششوں کی اجازت نہیں دے گی اور ملک کا تحمل فطری قوت سے پیدا ہوا ہے اور اسے معمولی نہیں سمجھنا چاہئے۔ انہوں نے کہاکہ گزشتہ ایک سال ہمارے لئے بہت چیلنجنگ رہا۔ آپ ہماری شمالی سرحدوں پر چین کے ساتھ ہوئے واقعات سے واقف ہیں۔ صورتحال کو کنٹرول میں رکھنے کے لئے حال ہی میں 14ویں سینئر آرمی کمانڈر سطح کی بات چیت ہوئی۔انہوں نے کہاکہ مختلف سطحوں پر مشترکہ کوششوں کی وجہ سے کئی علاقوں میں ٹوٹ پھوٹ ہوئی ہے، یہ اپنے آپ میں ایک مثبت پیش رفت ہے۔ موجودہ صورتحال کو باہمی اور مساوی سلامتی کے اصول کی بنیاد پر حل کرنے کے لئے ہماری کوششیں جاری رہیں گی۔واضح رہے کہ بھارت مقبوضہ کشمیر میں اپنے ریاستی جبر کو جاری رکھنے کے لیے پاکستان میں دہشت گردوں کو تربیت دینے کا راگ الاپتا رہتا ہے ،اور بھارتی آرمی چیف کا بیان بھی اسی سلسلے کی کڑی ہے ، اس طرح کے بیانات کا مقصد بھارت کی جانب سے عالمی برادری کی آنکھوں میں دھول جھونکنا ہے ، لیکن بہادر کشمیریوں نے اپنی مسلسل جدوجہد آزادی کے ذریعے بھارت کے اس حربے کو ناکام بنا دیا ہے اور اب دنیا کشمیر کے مسئلے سے آگاہ ہو چکی ہے ،
