لاہور(یو این آئی نیوز)پاکستان مسلم لیگ (ق ) کی لاہور میں پارلیمانی پارٹی کا اجلاس ، آئندہ کی سیاسی حکمت عملی کے بارے میں اجلاس کے شرکا نے فیصلوں کا اختیار چودھری پرویز الہی کو سونپ دیا گیا ہے۔مسلم لیگ پنجاب کے صدر چودھری پرویزالہی نے اجلاس کی صدارت کی جبکہ تمام ارکان نے چودھری شجاعت حسین کی صحت یابی کیلئے دعا کی۔اجلاس میں مسلم لیگی ارکان اسمبلی نے بڑھتی ہوئی بیروزگاری اور مہنگائی ،ڈالر، پٹرول، بجلی اور گیس کی بڑھتی ہوئی قیمتوں اور امن و امان کی ابتر صورتحال پر بھی تشویش کا اظہار کیا ۔اجلاس کا اعلامیہ جاری کیا گیا جس میں کہا گیا کہ ان تمام وجوہات کی بنا پر حکومت کے ساتھ چلنا مشکل ہوتا جا رہا ہے ، عوامی نمائندے اپنے حلقوں میں عوام کا سامنا کیسے کریں ، عام آدمی اذیت میں مبتلا ہے جبکہ حکومت عوامی مشکلات کے تدارک میں ناکام دکھائی دیتی ہے۔اعلامیہ میں مزید کہا گیا کہ حکومت نان ایشوز کو ایشوز بنا کر عام آدمی کے زخموں پر نمک چھڑک رہی ہے ، عام آدمی کو ریلیف نہ دیا گیا تو حالات مزید بگڑیں گے ، حکومت سنجیدگی سے ان تمام ایشوز کا فی الفور ازالہ کرے ۔پارلیمانی پارٹی کے اجلاس میں تمام ارکان اسمبلی کی جانب سے فیصلوں کا اختیار چودھری پرویزالہی کو دیدیا گیا جبکہ اجلاس میں وفاقی وزرا طارق بشیر چیمہ ،مونس الہی اور سینیٹر کامل علی آغا شریک ہوئے۔ارکان قومی اسمبلی سالک حسین، حسین الہی اور مسز فرخ خان ،صوبائی وزرا حافظ عمار یاسر اور با رضوان ،ارکان پنجاب اسمبلی ساجد احمد خان بھٹی، عبداللہ یوسف وڑائچ ،ڈاکٹر محمد افضل اور احسان الحق چودھری ،شجاعت نواز اجنالہ اور خدیجہ عمر مفتی عبیدالرحمن اورشافع حسین بھی اجلاس میں شریک ہوئے۔
