اسلام آباد(یو این آئی نیوز )سابق صدر آصف علی زرداری نے کہا کہ اگلی باری پیپلزپارٹی کی ہوگی، یہ حکومت ہے ہی نااہل، احتساب عدالت کے باہر صحافیوں سے غیر رسمی گفتگو کرتے ہوئے انھوں نے کہا کہ معیشت کی تباہی تک احتساب کا سلسلہ جاری رہے گا۔یہ حکومت ہے ہی نااہل ، ان سے جب پوچھا گیا کہ اگلی باری کس کی دیکھ رہے ہیں تو انھوں نے کہا کہ اگلی بار ی پیپلزپارٹی کی ہو گی
آصف زرداری اپنے وکیل فاروق ایچ نائیک کے ہمراہ احتساب عدالت کے جج سید اصغر علی کے روبرو پیش ہوئے جہاں انھوں نے آٹھ ارب کی مشکوک ٹرانزیکشن کے نیب ریفرنس میں نیب ترمیمی آرڈیننس کی بنیاد پرمقدمے سے بری کرنے کی استدعا کر دی۔ فاروق ایچ نائیک نے بریت کی درخواست دائر کرتے ہوئے موقف اختیار کیا کہ نیب ترمیمی آرڈی نینس کے بعد کیس نہیں بنتا، فرد جرم بھی عائد نہیں کی جا سکتی۔ اس کیس میں قومی خزانے کو نقصان پہنچانے کا کوئی الزام نہیں۔ یہ کیس کرپشن اور کرپٹ پریکٹسز میں آتا ہی نہیں، درخواست پر نیب کو نوٹس جاری کر کے جواب طلب کریں۔ احتساب عدالت سید اصغر علی نے کہا کہ پہلے آپ اس درخواست کے قابل سماعت ہونے پر تو مطمئن کریں۔ عدالت نے ابتدائی دلائل سننے کے بعد درخواست کے قابل سماعت ہونے پر فیصلہ محفوظ کر لیا جو کچھ دیر میں سنایا جائے گا۔
