اسلام آباد ( یو این آئی نیوز):
الیکشن کمیشن کا اہم اجلاس، صوبائی اسمبلی پنجاب کے 20حلقوں کے پرامن انتخابات کے انعقاد کویقینی بنانے کے لئے ضروری ہدایات جاری کردی گئیں۔اجلا س کی صدارت چیف الیکشن کمشنرسکندر سلطان راجہ نے کی ،
اجلاس کے بعد الیکشن کمیشن کی جانب سے جاری بیان کے مطابق صوبائی الیکشن کمشنر پنجاب ،تمام ڈسٹرکٹ ریٹرننگ افسران ، ریٹرننگ افسران اور ڈسٹرکٹ مانیٹرننگ افسران کوہدایت دی گئی کہ اگر پولنگ سے قبل ، پولنگ یارزلٹ کی تیاری کے دوران اگر کہیں بھی کوئی شر پسند عناصر الیکشن کے ماحول کو خراب کرے یا خراب کرنا چاہے تو قانون نافذکرنے والے اداروں کو تحریری طور پر مطلع کیاجائے اور ایسے افراد کے خلاف آئین اور قانون کے مطابق سخت کارروائی کو یقینی بنایا جائے ۔
دوسری ہدایت کے مطابق چیف الیکشن کمشنر نے چیف سیکرٹری پنجاب ، آئی جی پنجاب اور متعلقہ اداروں کےاعلی عہدیداران سے ذاتی طور پر ٹیلی فون پر بات کی اور انہیں انتخابات کے دوران پر امن ماحول کو یقینی بنانے کا کہا مزید انہیں ہدایات جاری کیں گئیں کہ کسی بھی انتخابی حلقے میں ہر قسم کے اسلحے کی نمائش ممنوع ہے اور کسی شخص، امیدوار یا پارٹی کے کارکنان کو اسلحے کے Display کی اجازت نہیں ہے ۔
تیسری ہدایت کے مطابق کسی دوسرے ضلع یا صوبے سے اسلحہ برادر شخص کو صوبہ پنجاب میں داخلے کی اجازت نہ دی جائے مزید برآں یہ بھی ہدایات جاری کیں گئیں کہ اگر کوئی امیدوار اسلحہ برادر اکٹھے کرتا ہے اور اس کو اپنی سیاسی مہم یا الیکشن کے دوران استعمال کرتاہے تو اس کے خلاف سخت قانونی کارروائی کی جائے ۔ اور اس کا کیس الیکشن کمیشن میں بھیجا جائے تاکہ ایسے امیدوار کے خلاف الیکشن قوانین کے تحت کارروائی کی جائے ۔ الیکشن کمیشن نے یہ بھی واضح کیا کہ الیکشن کا پرامن انعقاد اور الیکشن کے دوران ووٹروں کو پرامن ماحول کی فراہمی الیکشن کمیشن اور قانون نافذکرنے والے اداروں کی ذمہ داری ہے ۔لہذا اس ذمہ داری کو تمام ادارے قومی فریضہ سمجھ کر ادا کریں ۔
