اسلام آباد( یو این آئی نیوز):
وفاقی وزیر برائے قانون و انصاف سینیٹر اعظم نذیر تارڑ کی زیر صدارت جبری گمشدگی اور لاپتہ افراد کے حوالے سے قائم کابینہ کی ذیلی کمیٹی کا تیسرا اجلاس منعقد ہوا۔اجلاس میں وفاقی وزیر برائے انسانی حقوق میاں ریاض حسین پیرزادہ، وفاقی وزیر برائے بحری امور فیصل سبزواری، وفاقی وزیر برائے سائنس اور ٹیکنالوجی آغا حسن بلوچ اور وزارت داخلہ کے اعلی حکام نے شرکت کی۔
چیئرپرسن رائٹس گروپ ڈیفینس آف ہیومن رائٹس پاکستان آمنہ مسعود جنجوعہ کو اجلاس میں شرکت کی خصوصی دعوت دی گئی تھی ۔آمنہ مسعود جنجوعہ نے لاپتہ افراد کے معاملے کو حل کرنے کے لیے کمیٹی کے سامنے اپنی تجاویز رکھیں، اس مو قع پروفاقی وزیر برائے انسانی حقوق میاں ریاض حسین پیرزادہ نے بھی اپنے خیالات کا اظہار کرتے ہوئے اپنی تجاویز پیش کیں۔
اجلاس میں ایڈیشنل سیکرٹری ہوم بلوچستان نے بھی شرکت کی اور کمیٹی کے سامنے اپنی تجاویز پیش کیں ۔کمیٹی نے معاملے کی سنجیدگی کو مدنظر رکھتے ہوئے لاپتہ افراد کے معاملے پر چار سے پانچ ہفتوں میں کابینہ کے سامنے اپنی سفارشات پیش کرنے کے عزم کا اعادہ کیا۔کمیٹی کے آئندہ اجلاسوں میں دیگر سٹیک ہولڈرز کو بھی شرکت اور اپنی تجاویز پیش کرنے کی دعوت دی جائے گی۔
ہیومن رائٹس کمیشن آف پاکستان، بار ایسوسی ایشنز کے نمائندوں کو بھی آئندہ اجلاس میں شرکت کی دعوت دی جائے گی۔آئندہ اجلاس میں سینیٹر کامران مرتضی اور صدر سپریم کورٹ بار ایسوسی ایشن احسن بھون کو بھی شرکت کی دعوت دی جائے گی کمیٹی کا اگلا اجلاس 19 جولائی بروز منگل تین بجے منعقد ہو گا۔
